Almaty ákimdigi áleýmettik jelilerde taraǵan aqparatqa túsinik berdi. Onda Almaty qalasy ákiminiń koronavirýs infektsiiasy tirkelse, joǵary daiyndyqty qamtamasyz etýge buiryq bergeni týraly aitylǵan, dep habarlaidy "Ult aqparat".
«Áleýmettik jelilerde Almatyda koronavirýs infektsiiasy tirkelse, joǵary daiyndyqty qamtamasyz etý sharalary týraly qala ákiminiń buiryǵy bar degen aqparat tarap ketti. Biz taratylǵan aqparattyń shyndyqqa janaspaitynyn resmi túrde habarlaimyz. Bul – jalǵan. Sonymen birge, qalada COVID-2019 koronavirýstyq infektsiiasynyń taralýyna qarsy belsendi jumys júrip jatqanyn málim etemiz. Qazirgi ýaqytta megapolistegi jaǵdai turaqty. Koronavirýs tirkelgen joq», - dep jazdy ákiminiń baspasóz hatshysy Áset Muqajanov Instagram-da.
Sonymen qatar, ol azamattardy resmi derekkózderdegi aqparatty paidalanýǵa shaqyrdy. Anyqtama úshin 1406 Call-ortalyǵy táýlik boiy jumys isteidi.
«Almaty qalasy ákimdiginiń qoǵammen bailanys qyzmeti únemi kúndelikti jaǵdai týraly habarlaidy. Almatyda koronavirýstyq infektsiianyń aldyn alý jónindegi aimaqtyq shtab jumys isteidi. Kúsheitilgen sanitarlyq-karantindik baqylaý sharalary júzege asyrylýda. Qaladaǵy jaǵdai baqylaýda», - dep atap ótken ol.
