Foto: Polisia.kz
Tarazda IIM uiymdasqan qylmysqa qarsy kúres departamenti Jambyl oblysy politsiia departamentimen jáne UQK qyzmetkerlerimen birlesip, prokýratýranyń úilestirýimen uzaq merzimdi ázirleý jáne jedel-tergeý is-sharalarynyń kesheni barysynda turaqty negizde áreket etken qylmystyq toptyń jolyn kesti, – dep habarlaidy Polisia.kz portaly.
"Buǵan deiin vedomstvonyń jedel qyzmetkerleriniń nazaryna birneshe ret bopsalaýǵa, qylmystyq teketiresterge, qala men oblys aýmaǵyndaǵy kásipkerlerden qaryzdardy qaitarýǵa qatysqan top túsken.
Qylmystyq toptyń jetekshisi sońǵy kezderi ózin qoǵam belsendisi retinde kórsetip, jastardy tárbieleý jónindegi patriottyq qozǵalystyń atyn jamylyp, “qaiyrymdylyq qoǵamdyq qoryn” qurǵan" - delingen habarlamada.
Ol óziniń qylmystyq bedelin “ádilettilikti jaqtaýshy” bloger imidjine túbegeili ózgertip, áleýmettik jelilerde belsendi bola bastaǵan.
Óz qoryna erikti jarnalar túrinde qylmystyq “qamqorlyǵy” úshin kásipkerlerden aqsha bopsalap otyrǵan. Buǵan kelispegenderge kúsh qoldanǵan.
"Politsiiaǵa toptyń toǵyz múshesi jetkizildi, 20-dan astam tintý júrgizilip, qańtar oqiǵasy kezinde oblystyq politsiia departamentinen urlanǵan Kalashnikov avtomaty, eki Makarov tapanshasy, myltyq, travmatikalyq tapansha men basqa da sýyq qarý tárkilendi. Sonymen qatar qylmystyq toptan eki keliden astam esirtki tárkilendi. Qylmystyq topqa qatysýshylarǵa qatysty bopsalaý, qarý men esirtkini zańsyz saqtaǵany úshin 12 qylmystyq is qozǵaldy. Kúdiktiler ýaqytsha ustaý izoliatoryna qamaldy. Tergeý jalǵasyp jatyr", – dedi QR IIM uiymdasqan qylmysqa qarsy kúres departamentiniń basqarma bastyǵy Qýandyq Alpys.
