Úkimet otyrysy boiynsha ótken baspasóz konferentsiiasynda eńbek jáne halyqty áleýmettik qorǵaý ministri Birjan Nurymbetov álemde qalyptasqan ekonomikalyq jaǵdaiǵa bailanysty turǵyndarǵa áleýmettik tólem jasaý qalai ózgeretini týraly aityp berdi, dep habaralidy "Ult aqparat" primeminister.kz saityna silteme jasap.
«Syrtqy naryqta qalyptasqan, Qazaqstannyń ekonomikasyna yqpalyn tigizip otyrǵan jaǵdaiǵa qaramastan, memleket el halqynyń aldyndaǵy barlyq áleýmettik mindettemelerin tolyq kólemde oryndaityn bolady. Qazaqstanda 4 mln-nan astam adam zeinetaqy men túrli járdemaqylar alady. Bul maqsatqa 3,4 trln teńge qarastyrylǵan», — dedi ministr.
Sonymen qosa, ol aldaǵy jyldary áleýmettik tólemderdiń qysqarmaitynyn aitty.
«Áleýmettik tólemder eshýaqytta qysqarmaidy. Bul Premer-Ministrdiń búgingi tapsyrmasyna orai ǵana emes. Bul – bizdiń memleketimizdiń 10 jyldan astam ýaqyttan bergi áleýmettik saiasattaǵy negizgi ustanymy. Sondyqtan áleýmettik tólemderdiń kólemi eshqashan azaimaidy. Kerisinshe, biz aldaǵy kezeńde eger infliatsiia ósetin bolsa, tólemderdi arttyrýdy josparlap otyrmyz. Eger aldaǵy ýaqytta infliatsiia deńgeii josparlanǵan dálizden asatyn bolsa, zeinetaqy men járdemaqy indeksatsiialanatyn bolady», — dedi B. Nurymbetov.
Ministrdiń aitýynsha, qazaqstandyqtardyń jalaqy kólemi de azaimaityn bolady. Jalaqy ýaqytyly tólenedi. Biýdjettik uiymdardyń jumyskerleriniń jalaqysyn kóterýge qatysty, biyl ol biýdjettiń múmkindikterine bailanysty bolady.
«Ótken jyly 1 maýsymnan bastap biýdjet salasynda jalaqy 30%-ǵa kóterildi. 2020 jyldyń 1 qańtarynan bastap sonymen qatar biýdjettik uiymdardyń jumyskerleriniń jalaqysy orta eseppen 30%-ǵa kóterildi», — dedi ministr.
Jekemenshik uiymdar týraly aita otyryp, Birjan Nurymbetov olardy indeksatsiia men jalaqynyń ósirilýine táýeldi etý qiyn bolatynyn aitty. Bul rette, Úkimettiń negizgi mindeti jumys oryndaryn saqtaý jáne aǵymdaǵy eńbekaqyny ýaqytyly tóleý bolyp qala beredi.
«Aldyńǵy jyldary jumys berýshiler biznestiń joǵary áleýmettik jaýapkershiligin kórsetti. Biz taǵy da osydan úmittenetin bolamyz», — dedi B. Nurymbetov.
