QR Premer-Ministriniń orynbasary Berdibek Saparbaev mindetti áleýmettik meditsinalyq saqtandyrýdy engizý merzimi ózgertilmeitinin jáne jyl sońyna deiin barlyq óńirler buǵan daiyn bolýy tiistigin tapsyrdy. Bul týraly ol Qaraǵandy oblysynda ótken keńes barysynda aitty, dep habarlaidy "Ult aqparat".
Oblys ákimdiginiń baspasóz qyzmetinen málim etkendei, Qaraǵandyda vitse-premer birqatar meditsinalyq nysandardy aralap, Densaýlyq saqtaý ministri Eljan Birtanovtyń, Eńbek jáne halyqty áleýmettik qorǵaý ministri Birjan Nurymbetovtiń, oblystar jáne Nur-Sultan, Almaty, Shymkent qalalarynyń ákimderi orynbasarlarynyń qatysýymen keńes ótkizdi.
Talqyǵa salynǵan negizgi taqyryp ózin-ózi jumyspen qamtyǵan halyqtyń mártebesin ózektendirý, túsindirý jumystaryn júrgizý jáne mindetti áleýmettik meditsinalyq saqtandyrýdy engizý sheńberinde saqtandyrý aýdarymdarynyń ýaqtyly júzege asyrylýyn qamtamasyz etý máseleleri boldy. «Eń bastysy – halyqtyń mártebesin ózektendirý. Bizde jaqsy tájiribe bar. Alaida, kemshilikterdi de jasyrýǵa bolmaidy. Jyl sońyna deiin mártebesi áli anyqtalmaǵan barlyq adamdardy qamtý kerek. Árbir qazaqstandyq bul júieniń qalai jumys isteitinin, ásirese aýyldyq jerlerde meditsinalyq kómekti qalai ala alatynyn bilýi tiis. Tólemderdiń ýaqtyly jasalatynyna qatysty toqtalar bolsaq, bul máseleni de sheshý qajet. Salyq organdary salyqty jáne mindetti áleýmettik tólemderdi, onyń ishinde MÁMS tóleýdi baqylaýdy jáne jumysty kúsheitýi tiis. 2020 jyldyń 1 qańtarynan bastap MÁMS iske qosý boiynsha Elbasy men Prezidenttiń tapsyrmalary bar. Merzimder aýystyrylmaidy. Barlyq óńirler jyl sońyna deiin daiyn bolýy tiis», - dedi Berdibek Saparbaev.
Premer orynbasary atap ótkendei, meditsinalyq saqtandyrýdy engizýge daiyndyq joǵary. Qaraǵandy oblysynda MÁMS-ti aprobatsiialaýdyń alǵashqy aiy aiaqtaldy. Ol Densaýlyq saqtaý júiesi kelesi jyldan bastap meditsinalyq saqtandyrýdy búkil el boiynsha engizýge daiyn ekenin kórsetti. Sonymen qatar MÁMS júiesine qoldaý retinde densaýlyq saqtaý júiesiniń ardagerleri, joǵary sanatty dáriger, meditsina ǵylymdarynyń doktory, professor Abai Baigenjin jáne burynǵy Densaýlyq saqtaý ministri, meditsina ǵylymdarynyń doktory Jaqsylyq Dosqaliev óz pikirlerin bildirdi. «Álemdegi birde-bir memleket, tipti eń bai memleket óz azamattarynyń densaýlyǵy úshin qarjylyq jaýapkershilik aýyrtpalyǵyn kótere almaidy. Bizdiń sanamyzǵa Keńes zamanynan beri memleket meditsinalyq qyzmetterdi tóleýge, qymbat otalardy tegin júrgizýge, dári-dármekterdi tegin berýge tiis degen pikir berik ornap qalǵan. MÁMS adamdardy óz densaýlyǵyna jaýapkershilikpen qaraýǵa úiretedi. Azamattar ózderiniń densaýlyǵyna jaýapty ekenin túsinýi tiis. MÁMS engizý densaýlyq saqtaý salasyn resýrstyq qamtamasyz etýdi aitarlyqtai arttyrýǵa, meditsinalyq mekemeler men qyzmetkerlerdiń ekonomikalyq qyzyǵýshylyǵyn arttyrýǵa múmkindik beredi, densaýlyq saqtaýdy barynsha ikemdi jáne tiimdi qarjylandyrýǵa jol ashady», - dep esepteidi Abai Baigenjin. Keńes qorytyndysy boiynsha Berdibek Saparbaev meditsinalyq saqtandyrý júiesin engizý, halyqtyń mártebesin ózektendirý jáne halyqty aqparattandyrý boiynsha jumysty jalǵastyrýdy tapsyrdy.
«Miras» klinikasynyń jumysymen tanysý barysynda vitse-premer tsifrlandyrý júiesiniń engizilýimen, meditsinalyq qyzmetterdiń sapasymen, sondai-aq klinika qyzmetkerlerin qarjylyq qamtamasyz etý deńgeiimen tanysty. «Miras» klinikasy osy jyldyń qańtarynda MJÁ aiasynda ashylǵan bolatyn. Qazir mekemege 20 100 adam tirkelgen, onyń 7 900 – balalar. Oǵan táýligine 250 patsient qatysady. Olardy 32 dáriger qabyldaidy. Mekeme barlyq qajetti zamanaýi jabdyqtarmen, onyń ishinde gemodializge arnalǵan kreslolarmen jabdyqtalǵan. Berdibek Saparbaev sondai-aq «Life In» ońaltý ortalyǵynda boldy. Munda múmkindigi shekteýli balalar men hirýrgiialyq otalar jasalǵan naýqastar ambýlatorlyq-qalpyna keltirý emin alady. Ortalyqta 80-nen astam qyzmet túri kórsetiledi jáne 30 maman keńes beredi, onyń ishinde ortopedter, travmatologtar, nevrologtar, neirohirýrg jáne psihologtar. Sondai-aq munda kanis-terapiia baǵdarlamasy bar. Jaqyn arada kishkentai patsientterdi ippoterapiia arqyly emdeý úshin poni satyp alýdy josparlap otyr. Esterińizge sala keteiik, Qaraǵandy oblysy pilottyq rejimde mindetti áleýmettik meditsinalyq saqtandyrýdy engizgen alǵashqy óńir bolyp tabylady. Bul júie osy jyldyń 1 qyrkúieginde iske qosyldy, al elimizdiń basqa óńirlerinde ony 2020 jyldyń 1 qańtarynda ǵana engizetin bolady. Búgingi tańda Qaraǵandy oblysynda turǵyndarynyń 81% MÁMS júiesindegi mártebesi anyqtaldy.
