Prezidenttiń tapsyrmasyna sáikes áleýmettik mańyzdy taýarlardyń baǵasyn turaqtandyrý, azyq-túlik qaýipsizdigi máselesi búgin oblys ákimi Amandyq Batalovtyń tóraǵalyǵymen ótken selektorlyq jiynda talqylandy, dep habarlaidy "Ult aqparat" óńir basshysynyń baspasóz qyzmetine silteme jasap.
Áleýmettik mańyzdy taýarlardyń baǵasyn turaqtandyrý baǵytynda qabyldanǵan sharalar týraly oblys ákiminiń orynbasary Serik Turdaliev aityp berdi.
S.Turdalievtiń aitýynsha, aýdan, qala ákimderiniń tapsyrysyna sáikes turaqtandyrý qorynda 2226 tonna túrli azyq-túlik taýarlary daiyndalǵan. Onyń 912 tonnasy qazirgi kezde jergilikti jerlerge jetkizilgen. Bul óz kezeginde oblystyń óńirlerinde áleýmettik mańyzdy taýarlaryndyń baǵasyn tómendetýge múmkindik berdi.
A.Batalov óz sózinde qolǵa alynǵan sharalardyń nátijesinde baǵany turaqtandyrýda jaqsy qozǵalys baryn atap ótti. Degenmen júrgizilgen taldaý qorytyndylaryna qaraǵanda, áleýmettik mańyzdaǵy azyq-túlikterdiń keibir túrleri Eskeldi, Panfilov, Uiǵyr aýdandarynda kóterińki qalypta qalǵan. Osy aýdandardyń ákimderine jaqyn kúnderi jaǵdaidy turaqtandyrý týraly qatań eskertildi.
Nátijeli sharanyń taǵy biri – oblys ákiminiń tapsyrmasyna sáikes «Jetisý» ÁKK atqarǵan jumys.
«Jetisý» ÁKK basshysy Talǵat Malybaevtyń aitýynsha, áleýmettik mańyzdy azyq-túliktiń tizimine 19 túrli taýar kiredi, sonyń 17-si bizdiń oblysta óndiriledi. Olardyń baǵasyn ustap turý úshin «Jetisý» ÁKK oblystaǵy iri saýda núktelerimen jáne aýyl sharýashylyǵy taýar óndirýshilerimen kelisimshart jasasyp, sonyń negizinde kásipkerler bank kepildigine ainalym qarajatyn ala alady. Esesine olar halyqty áleýmettik mańyzdy azyq-túlik taýarlarymen qamtyp, baǵany yryqtandyryp ustap turýǵa tiis. Kelisimshart buzylǵan jaǵdaida saýda núkteleri de, aýyl sharýashylyǵy taýar óndirýshileri de salynǵan qarjyny qaitarýlary tiis. Búgingi kúni osy maqsatqa oblys biýdjetinen 1 mlrd. teńge bólindi. Amandyq Batalov qajet bolǵan jaǵdada qosymsha taǵy 1 mlrd. teńge bólinetinin aitty.
- Almaty oblysy – negizinen agrarlyq óńir. Sondyqtan biz oblysty barlyq qajetti azyqpen qamtamasyz etip, qosymsha qor jinaqtaýymyz kerek. Iaǵni burynǵydan da kóp jumys isteýge tiispiz. Kóktemgi dala jumystarynyń barlyǵy óz merziminde júrgizilip, eshqai jerde bosańsýǵa jol berilmeýi kerek. Ol úshin bizde barlyq jaǵdai bar, qajetti kómek kórsetilip keledi. Aýdan, qala ákimderi, tiisti basqarma basshylary kóktemgi dala jumystaryn erekshe baqylaýǵa alsyn. Qant zaýyttaryn 600 myń tonnadai qyzylshamen qamtamasyz etýimiz kerek. Al júgeriniń alqabyn 82 myń gektarǵa jetkizýdi mindetteimin. Zamanǵa sai agrotehnologiiany qoldana otyryp, ónimdilikti arttyrýǵa tiispiz, - dedi oblys ákimi.
