QR Eńbek jáne halyqty áleýmettik qorǵaý ministrligi halyqty áleýmettik qorǵaý salasyndaǵy áleýmettik qyzmetkerler úshin laýazymdyq mindetterin oryndaý kezindegi minez-qulyqtyń kásibi etikasy boiynsha ádistemelik usynymdardy bekitti. Bul Qazaqstan tarihyndaǵy áleýmettik sala mamandarynyń jumysyn retteitin alǵashqy qujat, dep habarlaidy "Ult aqparat" vedomstvonyń baspasóz qyzmetine silteme jasap.
«Ádistemelik usynymdar qoǵam tarapynan áleýmettik qyzmetkerlerge degen senimdi nyǵaitýǵa jáne olardyń mártebesin arttyrýǵa, áleýmettik qyzmetkerler men arnaiy áleýmettik qyzmetterdi alýshylar arasyndaǵy qarym-qatynastyń joǵary mádenietin qalyptastyrýǵa, sondai-aq ádepsiz minez-qulyq jaǵdailarynyń aldyn alýǵa baǵyttalǵan», delingen habarlamada.
Qujatqa sáikes, Áleýmettik ádilettilik, adaldyq, gýmanizm, quzyrettilik, úzdiksiz kásibi damý jáne t. b. áleýmettik qyzmetkerdiń negizgi etikalyq qaǵidalary bolyp tabylady. Sondai-aq, áleýmettik qyzmetkerlerge qyzmet alýshylarmen, áriptestermen jáne qoǵamda ózin qalai ustaý kerektigi týraly usynystar beriledi.
«Áleýmettik qyzmet kórsetý, halyqpen tikelei jumys isteý – bul ádistemelik bilim men daǵdylardy talap etetin eńbek. Adamdar qiyn ómirlik jaǵdaida olarǵa júginedi, bul moraldyq turaqtylyq pen arnaiy kásibi etikany qajet etedi. Áleýmettik qyzmetkerlerdiń minez-qulqy qoǵamnyń senimin nyǵaitýy kerek. Sapasyz qyzmet kórsetý men janjaldy jaǵdailardyń aldyn alý úshin kásibi etika maman daiarlaýdyń ajyramas bóligi bolýy kerek. Sondyqtan ministrlik UNICEF-pen birlesip áleýmettik qyzmetkerlerdiń etikalyq minez-qulqynyń ádistemelik usynymdaryn ázirledi jáne qabyldady», – dep atap ótti QR Eńbek jáne halyqty áleýmettik qorǵaý vitse-ministri Erlan Áýkenov.
Búgingi kúni Qazaqstannyń áleýmettik qyzmet kórsetý júiesinde 30 myńnan astam adam eńbek etedi, olardyń 11 myńy – áleýmettik qyzmetker.
