Qazaqstanda kepildendirilgen áleýmettik toptamamen qamtamasyz etý 2021 jyldan bastap Áleýmettik qyzmetter portalyna aýystyryldy, dep habarlaidy "Ult aqparat" Eńbek ministrligine silteme jasap.
Vedomostvonyń habarlaýynsha, osy jyldyń qazan aiynan bastap barlyq aimaqtarda Portal arqyly áleýmettik toptamamen qamtamasyz etý is-qimyly pilottyq rejimde qolǵa alyndy. Osylaisha, 3,5 myńǵa jýyq azamat jyl sońyna deiin qyzmetti proaktivti túrde ala alady.
QR Eńbek jáne halyqty áleýmettik qorǵaý vitse-ministri Erlan Áýkenov osy jyldyń 1 jeltoqsanyna deiin qalalyq jáne aýdandyq deńgeide jetkizýshilerdi Portalda akkreditteý úshin komissiia qurylatyny týraly aitty
Qazirgi ýaqytta qyzmet alýshylardy elektrondy-tsifrly qoltańba kiltterimen qamtamasyz etý boiynsha jumys júrgizilýde. Jumyspen qamtý ortalyqtary bolsa, Portalmen qalai jumys jasaý kerektigin túsindiredi.
Osy jyldyń qyrkúiek aiynda azyq-túlik sebetteriniń quramy men kólemine ózgerister engizildi. Atap aitqanda, azyq-túlik jiyntyǵy saqtaý merzimin uzartý úshin ýltrapasterlengen sútpen tolyqtyryldy. Qaraqumyq jarmasynyń maýsymdyq jetispeýshiligine bailanysty kúrish túrinde balama nusqa qarastyryldy.
Sondai-aq, balalarǵa arnalǵan jemis-jidek pen kókónis piýresi biriktirilip, osylaisha bala ózine unaǵan ónimdi tańdai alady.
Osy jyly, Eńbek ministrligi halyqtyń áleýmettik osal sanattaryna, sonyń ishinde ataýly áleýmettik kómek alatyn mektep jasyndaǵy balalarǵa qosymsha kómek kórsetkenin aitty.
Biylǵy naýryz aiynan bastap jáne tótenshe jaǵdai men karantindik shekteý sharalarynyń barlyq kezeńinde, 2 ailyq eseptik kórsetkish mólsherinde, azyq-túlik jiyntyqtaryn satyp alý úshin ai saiynǵy aqshalai tólem júrgizildi.
Naýryzdan mamyrǵa deiin jáne shildeden tamyzǵa deiingi aralyqta osy maqsattarǵa 1 millionnan astam adamǵa biýdjetten 25,6 milliard teńge bólindi. Onyń ishinde 200 myńnan astam bala tólemmen qamtyldy.
Sonymen qatar, osy kezeńde, mektep jasyna deiingi balalarǵa arnalǵan áleýmettik toptama sheńberinde zattai kómek kórsetý jalǵasyn tapty.
