Elimizde Áleýmettik kodeks tujyrymdamasynyń jobasy ázirlenip jatyr. Bul týraly Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«2015 jyly Qazaqstan BUU-ǵa múshe eldermen birge «Bizdiń álemdi ózgertý: 2030 jylǵa deiingi ornyqty damý maqsattaryndaǵy kún tártibi» atty jańa kún tártibin qabyldady. Atalǵan aýqymdy is-qimyl jospary azamattardyń ál-aýqatyn qamtamasyz etýge baǵyttalǵan. 2030 jylǵa deiin eseptelgen 17 Ornyqty damý maqsaty men 244 indikator ekonomikalyq, áleýmettik jáne ekologiialyq ál-aýqattyń tepe-teńdigin qamtamasyz etedi», - dedi Úkimet basshysy.
Asqar Maminniń atap ótýinshe, qazirgi ýaqytta Úkimet janynda Ornyqty damý maqsattary jónindegi úilestirý keńesi jumys isteidi. Onyń basty mindeti - Qazaqstan Respýblikasynda ornyqty damý maqsattaryn alǵa jyljytý boiynsha usynystar ázirleý. Ornyqty damý maqsattary qol jetkizý jónindegi is-sharalar keshenin ázirleý jáne júzege asyrýdy qamtamasyz etý úshin 5 vedomstvoaralyq jumys toby quryldy jáne qyzmet atqarady.
«Búgingi kúni Ornyqty damý maqsattarynyń sapaly jetistigin qamtamasyz etý úshin jáne olardy memlekettik josparlaý júiesiniń qujattaryna engizý boiynsha jumystar júrgizilýde. Sonymen birge qazirgi ýaqytta Áleýmettik kodeks tujyrymdamasynyń jobasy ázirlenýde, onyń sheńberinde halyqty áleýmettik qamtamasyz etý júiesin jetildirý boiynsha is-sharalar kesheni qarastyrylatyn bolady», - dedi QR Premer-Ministri.
