Búgin Almatydaǵy Dostyq úiinde BUU-nyń 6 tiline aýdarylǵan qazirgi qazaq ádebieti antologiiasynyń alǵashqy kitabynyń tanystyrylymy ótti.
Poeziia jáne proza jinaqtarynyń tanystyrylymyna osy jobaǵa qatysqan Ulybritaniia, Ispaniia, Frantsiia, Resei, Qytai jáne Egipet aýdarmashylary men ádebietshileri, aýdarma jáne baspa uiymdarynyń basshylary, shyǵarmalary qazirgi qazaq ádebieti antologiiasyna engen avtorlar qatysty.
Qazaq ádebietiniń úzdik týyndylaryn aýdarýǵa atsalysqan sheteldik baspagerler men jaýapty ókilderdiń atalǵan jobaǵa qatysty oi-pikirlerin bilgen edik. Marhabat!
Enni Misheilidoý, Kembridj ýniversiteti Halyqaralyq seriktestik bóliminiń jetekshisi (Ulybritaniia):
- Qazaq prozasy men poeziiasy antologiialaryn aǵylshyn tiline aýdaryp, jariialaýdy Qazaqstan men Ulybritaniia arasyndaǵy tabysty qarym-qatynasqa úles qosatyn joba retinde baǵalaimyz. «Rýhani jańǵyrý» baǵdarlamasyn júzege asyrýǵa atsalysýymyz – biz úshin asqan mártebe jáne bul qarym-qatynasymyz alda da jalǵasa beredi dep senemiz.
Qazaqstan Respýbliasynyń Tuńǵysh Prezdenti – Elbasy Nursultan Nazarbaev bastaǵan «Rýhani jańǵyrý» baǵdarlamasy – Qazaqstan halqynyń áleýetin ashýǵa, arttyrýǵa yqpal etetin aýqymdy joba. Osy baǵdarlama ekonomikalyq reformalardy bilim berý, óner, ádebiet jáne tarih salasyndaǵy jańǵyrýmen ushtastyrmaq.
Teri de lia Krýa, «Mishel de Mol» baspasynyń direktory (Frantsiia):
- Qazirgi qazaq ádebieti antologiialaryn frantsýz tilinde basyp shyǵarý «Mishel de Mol» baspasyna buiyrǵany biz úshin úlken mártebe. Teńizben ushtasqan kókjiekkke batatyn kún sáýlesin Shyǵysqa ala kelip, búgin osy jiynǵa qatysý men úshin úlken qýanysh.
Qazaq halqy osy tamasha bastamanyń arqasynda aqsha men ekonomika týraly ǵana aitatyn álemge óz jan dúniesin tanytýǵa múmkindik aldy. óz tarihyn, salt-dátúrin, ómirdiń poetikalyq mánin baiandai bastady. Bul isterge biz tek súisine qyzyǵa qaraimyz.
David Flores, aýdarmashy, «Vizor» baspasynyń ókili (Ispaniia):
- Byltyr qarasha aiynda Damý maqsatyndaǵy halyqaralyq seriktestik agenttiginiń qoldaýymen Madridte Qazaqstan mádenieti men ádebieti ortalyǵy ashyldy. Qazirgi tańda júzege asyp jatqan zamanaýi qazaq ádebieti antologiialarynyń ispan tiline aýdarýlyýymen qatar, osy eki oqiǵa qazaq ádebieti men mádenietiniń ispantildi álemge tanylýy men taralýyna yqpal etti. Budan bylai da qazirgi zamanǵy qazaq aqyn-jazýshylarynyń shyǵarmalary ispan tiline, al ispan ádebieti qazaq tiline aýdarylyp, ádebi sabatastyq jalǵasa beredi degen senimdemiz.
Abdýlrahim Abdýlýahid, «Media Hab» baspasynyń direktory:
- Qazaqstan Respýblikasynyń Tuńǵysh Prezidenti – Elbasy Nursultan nazarbaevtyń bastamasymen qolǵa alynǵan «Rýhani jańǵyrý» syndy mańyzdy strategiialyq baǵdarlama aiasynda júzege asyp jatqan «Jahandaǵy zamanaýi qazaqstandyq mádeniet» jobasyna aralasqanyma ózimdi erekshe baqytty sezinemin. Osy joba aiasynda qazaq ádebieti jaýharlary arab tiline aýdarylýy – qazaq eli men arab álemin bailanystyratyn altyn kópir ispettes.
Piao On Ry (Qytai):
- «Jahandaǵy zamanaýi qazaqstandyq mádeniet» QR Tuńǵysh Prezidenti – Elbasy N.Á. Nazarbaevtyń bastamasymen qolǵa alynǵan «Rýhani jańǵyrý» baǵdarlamasynyń mańyzdy tarmaǵy. Qazaqstan ádebieti men mádenietin ózge álemge tanystyrý buryn-sońdy bolmaǵan joba. Qytai men qazaq mádenieti uqsas. Qytaidaǵy «Bir beldeý – bir jol» strategiialyq úndeýi men Qazaqstannyń «Nurly jol» strategiialyq jospary barynsha qabysyp, eki eldiń mádeniet aýys-túiisi úzdiksiz tereńdep keledi. Baspamyz Qazaqstanda tyǵyz qarym-qatynas ornatyp, eki eldiń tańdaýly kitaptaryn ózara aýdaryp, basyp shyǵarýda. Osy oraida eki el mádenietin bailanystyrýshy kópir qyzmetin atqaryp otyrǵanymyzǵa qýanyshtymyz.
Ult portaly
