«Otandastar qory» KEAQ vitse-prezidenti Maǵaýiia Sarbasov sheteldegi qandastarmen bailanys ornatý jáne qazaq tilin úiretý jumystary týraly aityp berdi, dep habarlaidy QazAqparat.
«Otandastar» qorynyń uiymdastyrýymen 2019 jyly álemniń 25 elinen kelgen 5000 qandasty qamtyǵan 20-ǵa jýyq shara ótkizilse, 2020 jyly álemdi jaýlaǵan pandemiiaǵa orai barlyq joba onlain formatqa kóshirilgen.
«Degenmen, jumys toqtap qalǵan joq. Osy rette álemniń 26 elindegi otandastardyń qatysýymen 5 800-den astam adamdy qamtyǵan 13 onlain is-shara jáne 6 onlain-joba uiymdastyryldy. 2021 jyly da pandemiialyq shekteýlerge bailanysty ZOOM baǵdarlamasynda 20 eldi qamtyǵan 20 onlain kezdesý ótkizildi. Bul sharalardyń barlyǵynda syrttaǵy aǵaiynnyń kóshi-qon, iskerlik, mádeni-gýmanitarlyq máseleler men jobalarǵa qatysty usynystary men ótinishteri talqylandy», - dedi M. Sarbasov Ortalyq kommýnikatsiialar qyzmetinde ótken baspasóz máslihatynda.
Qor shetelde turatyn otandastarǵa qazaq tili kýrstaryn uiymdastyrý úshin 12 elde 31 onlain synyp ashqan.
Onlain synyptar teledidar, noýtbýk, kamera, taǵy basqa qajetti zamanaýi tehnikalarmen qamtylǵan.
2020 jyly 300-den astam onlain tegin sabaq ótkizildi. Oǵan myń jarym adam qatysyp, 400-ge jýyǵy qazaq tilin jetik meńgerdi degen sertifikat aldy.
Al 2021 jyly 350 tegin onlain sabaq ótkizildi. Onda 900 qandas testileýge qatysyp, qazaq tilin meńgerip shyqty.
«Qazirgi ýaqytta QR Bilim jáne ǵylym ministrliginiń qoldaýymen sheteldegi qandastarǵa qazaq tilin úiretý boiynsha ortaq ámbebap oqý quraldy ázirlenýde. Sebebi, latyn qarpimen nemese tóte jazýmen saýat ashqan balalarǵa kirillitsa úiretý qiyn. Sondyqtan, ámbebap ádisnama qajet boldy. Bul qural jyl sońyna deiin daiyn bolýy múmkin, qosymsha habardar etemiz», - deidi Maǵaýiia Sarbasov.
