Búgin álemge áigili fýtbolshy Diego Armando Maradona qaitys boldy, dep habarlaidy "Ult aqparat" «Telam» aqparat agenttigine silteme jasap.
«Argentinalyq juldyz Diego Armando Maradona 60 jasynda júrek talmasynan qaitys boldy», - delingen saitta.
Aqparatqa sáikes, álemdik fýtbol juldyzyna 3 qarasha kúni ota jasalǵan.
Maradona 1960 jyldyń 30 qazanynda Argentinanyń Lanýs qalasynda dúniege keldi. Fýtboldaǵy mansabyn 1976 jyly óz eliniń «Arhentinos Hýniors» komandasynda bastady. Odan keiin sol eldegi «Boka Hýniors» klýbynda dop tepti. 1982-1984 jyldarda Eýropada «Barselona», 1984-1991 jyldarda «Napoli», 1992-1993 jyldarda «Sevilia» klýbtarynyń namysyn qorǵady. Al 1993-1997 jyldarda Argentinanyń «Niýells Old Boiz», «Boka Hýniors» komandalarynda dop tepti.
1994 jyldan bastap bapkerlik qyzmetke bet burdy. Aldymen óz elindegi «Tekstil Mandiiý» komandasyn jattyqtyrǵan ol, 1995 jyly «Rasing» komandasynyń tizginin ustady. 2008-2010 jyldarda Argentina quramasyna jetekshilik jasady. Al 2011-2012 jyldarda Birikken Arab ámirliginiń «Al-Vasl», 2017-2018 jyldarda «Al-Fýdjaira» komandalarynda bas bapker boldy. Sondai-aq, 2018-2019 jyldarda Meksikanyń «Dorados» klýbyn jattyqtyrsa, 2019 jyldan beri Argentinanyń «Himnasiia-Esgrima» klýbynyń tizginin ustady.
