Braziliiada bir táýlikte qaza tapqandar sany rekordtyq kórsetkishke jetti – 4 myńnan asa adam. Ǵalymdar koronavirýspen aýyrǵandardyń úshten birinde psihikalyq aýytqý belgileri paida bolady degen qorytyndyǵy keldi. Bul týraly BBC habarlady.
Pandemiia AQSh-ta ketchýp tapshylyǵyn týdyrdy. Bul klassikalyq amerikandyq fastfýdqa degen suranystyń artýynan bolyp otyr.
Túrkiiada koronavirýs juqtyrǵandardyń táýliktik rekordtyq kórsetkishi tirkeldi – 50 myńǵa jýyq adam.
Djons Hopkins Ýniversitetiniń dereginshe, álemde koronavirýspen 132,5 mln adam aýyrǵan, 2,8 mln adam qaitys boldy.
Qazirgi kezde álem boiynsha eń aýyr epidemiologiialyq ahýal Braziliiada baiqalady. Onda bir táýlikte 4 myńnan asa adam qaitys boldy. Bul – pandemiia kezindegi rekordtyq kórsetkish.
Eldegi Covid-19 qurbandarynyń sany 337 myńǵa jetip, Braziliia álemde ólim sany boiynsha AQSh-tan keiingi ekinshi orynda tur.
Ýshyqqan jaǵdaiǵa qaramastan, Braziliia prezidenti Jair Bolsonarý lokdaýn men virýstyń taralýyn tejeitin kez kelgen sharalardyń engizilýine qarsy shyǵyp otyr.
Eýropadaǵy ahýal
Germaniia kantsleri Angela Merkel qysqa merzimge taǵy bir jalpyulttyq lokdaýn engizýdi oilap otyr, dedi sársenbi kúni úkimet ókili Ýlrike Demmer.
Germaniiada koronavirýs juqtyrǵandar sany 3 mln adamǵa jaqyndady, pandemiia kezinde 77,4 myń adam kóz jumdy.
Chehiia premer-ministri Andrei Babish sársenbi kúni pandemiia kezindegi tórtinshi densaýlyq saqtaý ministrin taǵaiyndaidy. Ol Praga aýrýhanasynyń bas dárigeri Petr Arenberger bolmaq.
Sársenbiden bastap britandyqtarǵa amerikandyq óndirýshiniń Moderna vaktsinasy egile bastaidy. Bul – britandyqtarǵa AstraZeneca jáne Pfizer-men qatar egiletin úshinshi preparat.
Italiiada saýdagerler men restoran ieleri bastaǵan narazylyq aktsiiasy kezinde eki politsiia qyzmetkeri zardap shekti.
AQSh vaktsinatsiia pasportyna qarsy shyqty
Aq úi kúndelikti ómirde qoldanylatyn vaktsinatsiia pasportynyń engizilýine qarsy shyqty. El biligi amerikandyqtardyń jeke ómiri men quqyqtary qorǵalýy kerek dep málimdedi.
Atalmysh tájiribe álemniń kóptegen elderinde talqyǵa tústi, keibir elderde, mysaly Izrailde keńinen qoldanylady. Kóp elder bunyń kúndelikti ómirdi qalpyna keltirýge jetýdegi eń tez jol dep sanaidy.
AQSh – pandemiiadan qatty japa shekken el. Elde 31 mln adam koronavirýs juqtyryp, 556,5 myń adam qaitys bolǵan. Keibir shtattar ekonomikaǵa zalaly kóp shekteý sharalarynan buryn da bas tartqan.
Covid-19 ben psihikalyq aýytqýlar arasyndaǵy bailanys Covid-19 juqtyrǵan 230 adam qatysqan zertteý barysynda aýrýdan keiingi alty aida adamdardyń úshten birinen mi jumysynyń buzylýy nemese psihikalyq aýytqýlar belgileri baiqala bastaǵan.
Osy derekterge sáikes, Oksford ýniversitetiniń ǵalymdary pandemiia barlyq Jer turǵyndarynda nevrologiialyq problemalar tolqynyna ákelýi múmkin deidi.
Zertteýshiler barlyǵy 14 túrli aýytqý anyqtaǵan, keń taralǵandary – depressiia, alańdaýshylyq jáne kóńil-kúi qubylmalylyǵy. Kovidten keiingi insýlt (7% aýyr jaǵdaidaǵy naýqastarda) jáne dementsiianyń erte belgileri (2%) sirek kezdesedi, degenmen ǵalymdar bulardy da eskergen jón deidi.
Soǵan qaramastan ǵalymdar koronavirýstyń adamnyń júike júiesine dál qalai áser etetinin ázirge aita almaidy.
Ǵalymdardyń aitýynsha, koronavirýsty endigári tek respiratorlyq infektsiia dep qabyldamaǵan jón. Joǵaryda aitylǵan másele dereý zertteýdi jáne tiisti sharalardyń qoldanylýyn talap etedi.
