Álem elderi infektsiiamen barynsha kúresýge tyrysyp jatyr. 29 naýryz túnde virýs juqtyrǵandar sany 660 myńnan asty. 140 myńnan astam adam aiyqqan. Epidemiia bastalǵaly beri virýstan kóz jumǵandar sany 30 myńnan asty.
Italiiada sońǵy táýlikte 889 adam kóz jumǵan. Bir kún ishinde 6 myń adamnan virýs tabylǵan. Epidemiia bastalǵaly beri shamamen on myń adam qaitys bolǵan. Virýs juqtyrǵandar sany 92 myńnan asady.
Frantsiiada pandemiia bastalǵaly beri virýs juqtyrǵandar sany 37 myńnan asyp ketken. 2300-den astam adam qaitys bolǵan. Premer-ministr Edýard Filipp alda eki kúrdeli apta kútip turǵanyn aitty.
Niderlandyda bir kúnde 93 adam qaitys boldy. 1159 adamnan koronavirýs tabyldy. Virýstan kóz jumǵandar sany 639 adamǵa jetken. Virýs juqtyrǵandar sany 9700-den asty.
Reseide bir kún ishinde 228 adamnan koronavirýs tabyldy. Virýs taraǵan ýaqyttan beri jeti adam qaitys boldy.
AQSh-ta virýs juqtyrǵandar sany 124 myńnan asty. AQSh prezidenti Donald Tramp senbi, 28 naýryzda Niý-Iork pen Niý-Djersi, Konnektikýt shtatynyń keibir aýdandarynda karantin engizý máselesin qarastyryp jatqanyn aitty. Virdjiniiaǵa barardyń aldynda Aq úidegi baspasóz jiynynda Tramp osylai dedi. Keiinirek Virdjiniiada prezident Comfort gospitaldik kemeni Niý-Iorkke jiberý sharasyna qatysqan.
Jýrnalisterdiń suraqtaryna jaýap bergen Tramp kompaniialar jumysyn 12 sáýirde jalǵastyra alady dep tolyq senimmen aita almaitynyn jetkizdi.
AQSh ulttyq gvardiiasynyń 12 myńnan astam sarbazy koronavirýspen kúres sharalaryna qatysyp jatyr. Olar naýqastardy tekserip, tamaq jetkizýmen ainalysady.
Senbi kúngi derek boiynsha, Niý-Iork shtatynda virýs juqtyrǵandar sany 52 myńnan asqan. Kórshi Niý-Djersi shtatynda - 8825 naýqas, Konnektikýtte - 1291 naýqas anyqtalǵan. Úsh shtatta koronavirýstan 6424 adam qaitys bolǵan. Kóbi - Niý-Iork turǵyndary.
