Dúniejúzilik densaýlyq saqtaý uiymy (DDU) álemde koronavirýs infektsiiasyn 173 myń adam juqtyrǵanyn, taǵy 7 myń adam indetten jan tapsyrǵanyn málim etti, dep habarlaidy VVS.
Ótken aptada DDU Eýropany virýstyń «oshaǵy» dep jariialap, el úkimetterin COVID-19-dyń taralýyn baqylaý úshin kóbirek shara qabyldaýǵa shaqyrǵan edi.
Germaniiada kantsler Angela Merkel dini ǵuryptardy ótkizýge tyiym salyp, azamattardan ishki nemese sheteldik saparlarǵa shyqpaýyn surady. Klýbtar, barlar, oiyn-saýyq oryndary, haiýanattar baǵy jáne oiyn alańdary jabylady. Meiramhanalar jumys ýaqytyn shekteý úshin kesteler arasyndaǵy qashyqtyqty saqtaýy tiis. Eldegi mektepterdiń bári qazirdiń ózinde jabyq tur.
Qazirgi ýaqytta Germaniiada koronavirýs infektsiiasynyń 7 myń rastalǵan jaǵdaiy bar. Virýs 14 adamnyń ómirin qiǵan. Halyqtyń bir jerge jinalýyna resmi tyiym salynǵan.
Al Ispaniia qazirgi ýaqytta koronavirýstan zardap shekken memleketterdiń ishinde tórtinshi orynda tur. Seisenbi kúni ondaǵy el biligi koronavirýstan qaitys bolǵandardyń sany 342-den 491-ge óskenin málimdedi. Rastalǵan jaǵdailar 9 942-den 11 178-ge deiin artty. Senbide elde karantin ishinara engizildi.
Virýs shyqqan Qytaidan tysqary eń kóp zardap shekken elderdiń basynda Italiia tur. Dúisenbide ol eldiń biligi ólim-jitimniń óskenin habarlady. Qaitys bolǵandardyń sany 2 myń adamnan asty.
Belgiiada koronavirýsty juqtyrǵandar sany seisenbide besten 10-ǵa deiin, iaǵni eki ese artty.
Sársenbide Shvetsiia barlyq joǵary oqý orny men mektepterdi jabady.
Búgingi tańda Frantsiiada 6 myńnan astam jaǵdai jáne 148 ólim týraly habarlanǵan.
Eýropadan tys ahýal qandai?
Seisenbide AQSh-tyń Demokratiialyq sailaý boiynsha Ogaio shtatynda, keiin Arizona, Florida jáne Illinois shtattarynda ótýi tiis daýys berý keiinge qaldyryldy.
Prezident Donald Tramp koronavirýsqa bailanysty tótenshe jaǵdai jazdyń sońyna deiin nemese odan da uzaqqa sozylýy múmkin ekenin, al amerikalyqtar aldaǵy 15 kúnde 10-nan astam adamnan turatyn topqa jinalmaýy kerektigin, sondai-aq barlarǵa, meiramhanalarǵa, tamaqtaný alańdaryna jáne sport zaldaryna barýdan aýlaq bolý kerektigin málimdedi.
Seisenbi kúni Qytai ózge elderden kelgen 20 adamnan infektsiia anyqtalǵanyn habarlady.
Al Filippin óz birjasyn belgisiz merzimge japqan alǵashqy el boldy.
Koronavirýstan eń kóp zardap shekken úshinshi el – Iran. Munda sot ókili virýstyń taralýyna bailanysty 85 myńǵa jýyq tutqynnyń, onyń ishinde saiasi tutqyndar ýaqytsha bosatylǵanyn málim etti.
Malaiziia sársenbiden bastap Singapýrmen shekaradan ótýge tyiym salady.
Úndistandaǵy Tadj Mahal eskertkish-kesheni jabyldy.
Avstraliialyq ǵalymdar aǵzanyń immýndyq júiesi Covid-19 virýsymen qalai kúresetindigin anyqtaǵanyn málimdedi.
DDU basshysy Tedros Adhanom Gebreiesýs basqa elderge virýspen kúreste Qytai men Ońtústik Koreiadan úlgi alýǵa keńes berdi.
