Dúniejúzilik densaýlyq saqtaý uiymy (DDSU) álemde bir kúnde 106 myńnan astam adamnan koronavirýs tabylǵanyn habarlady. Bul - buryn-sońdy bolmaǵan eń joǵary kórsetkish.
Álemde virýs juqtyrǵandar 5 million adamǵa jýyqtady. 325 myńnan astam adam koronavirýstan qaitys bolǵan.
Eýropa elderi indettiń beti qaitqanyn habarlap, shekteý sharalaryn birtindep jumsartsa, damýshy elderde virýs órshigen.
DDSU-nyń málimeti boiynsha, Latyn Amerika elderi, Úndistan jáne ózge aimaqtarda infektsiia jyldam tarap, testter jii júrgizile bastaǵan.
"Pandemiia áli uzaqqa sozylady. Biz tabysy ortasha jáne tómen elderde koronavirýs juqtyrǵandardyń artýyna alańdap otyrmyz" dedi Dúniejúzilik densaýlyq saqtaý uiymynyń jetekshisi Tedros Gebreiesýs.
Braziliiada koronavirýstan qaitys bolǵandar sany artyp, 18 myńnan asqan. Latyn Amerikadaǵy eń iri el álemde koronavirýs juqtyrǵandar sany (275 myń adam) boiynsha úshinshi orynǵa shyqty. Úndistanda bir kúnde 100 myńnan astam test júrgizilip, bir kúnde 5 611 adamnan koronavirýs tabyldy.
