Sońǵy 50 jylda qol jetkizilgen órkeniettegi jetistikterge qaramastan, Jer shary turǵyndarynyń saýatsyzdyq deńgeii tómen kúiinde qalyp otyr, dep habarlaidy Anadoly agenttigi.
IýNESKO-nyń bergen málimetterine qaraǵanda, álemde 750 million adam ne oqýdy, ne jazýdy bilmeidi. Sonyń úshten ekisi - áielder.
Saýat ashpaǵan adamdardyń 45 paiyzy Ońtústik Aziiada ómir súredi. 27 paiyzy «Qara Afrika» (Sahara shólinen ońtústikke qarai), 10 paiyzy Shyǵys jáne Ońtústik-Shyǵys Aziia, 9 paiyzy Soltústik Afrika jáne Batys Aziia, tórt paiyzy Latyn Amerikasy men Karib basseini elderiniń úlesinde.
IýNESKO Statistika institýtynyń málimetinshe, sońǵy kezderi saýattylyq deńgeiiniń eń joǵary ósimi Shyǵys jáne Ońtústik Aziia, Soltústik jáne Batys Afrika elderinde baiqalǵan.
Atap aitqanda, Ońtústik Aziia turǵyndarynyń saýattylyq deńgeii 1990-2016 jyldar aralyǵynda 46 paiyzdan 72 paiyzǵa deiin, Soltústik Afrika men Batys Aziiada 64 paiyzdan 81 paiyzǵa deiin kóterilgen.
Shyǵys jáne Ońtústik-Shyǵys Aziiada bul kórsetkish burynǵy 82 paiyzdyń ornyna 96 paiyzǵa jetip otyr, al Afrikanyń Saharadan ońtústikke qarai ornalasqan elderinde 52 paiyzdan 65 paiyzǵa deiin ósken.
Sonymen qatar sarapshylar erlerge qaraǵanda áielder arasynda saýatsyzdyq deńgeiiniń joǵary ekendigin atap kórsetedi. Sońǵy derekter boiynsha, saýatsyzdardyń 59 paiyzy - áielder.
