Taldyqorǵanda tańdai qaqtyrǵan tamasha kesh ótti. Naqtyraq aitqanda, Jetisý jerine «Álem talanttary» qorynyń qoldaýymen tórtkildi túgel ónerimen tánti etken erekshe daýys ieleri keldi. I. Jansúgirov atyndaǵy Mádeniet saraiynda ótken gala-kontsertte tamashalaýshynyń da qatary kóp boldy. Bálkim, mýzyka da til bolmaidy degenniń, bálkim, ónerde shekara joq degenniń kýási ma edi, áiteýir, óner shańyraǵynyń keńistigi de án men kúige tolyp ketkendei kórindi.
Aitýly sharada álemdik klassika, operetta, zamanaýi sazgerlerdiń mýzykalary oinaldy. Sahna shymyldyǵyn birinshi bolyp oblystyq Súiinbai atyndaǵy filarmoniiasynyń M. Tólebaev atyndaǵy qazaq-ult aspaptary orkestri ashty. Olar Qazaqstan Kompozitorlar odaǵynyń múshesi Áli Alpysbaevtyń dirijerlyǵymen orys sazgerleriniń klassikalyq týyndylaryn asqaqtata oryndady. Tyńdaýshynyń quryshyn qandyratyn qundy shyǵarmalardy saǵynyp kelgen jurt ta qoshametterin aiaǵan joq.
«Qýyrdaqtyń kókesin túie soiǵanda kóresiń» demekshi, budan soń álemge aty máshhúr avtorlar shyǵarmalaryna da kezek berildi. Nebir jaýhar týyndyny ómirge ákelgen Imre Kalman, Frantsa Legar, Nikolai Strelnikov, Jak Offenbah, Endriý Lloid Ýebber, Frederik Loý, Aleksei Rybnikov sekildi áigili kompozitorlardyń ánderi shyrqalyp, kórermendi quddy sarai keńistiginen hrýstal-notalar syńǵyry estilip turǵandai áserde qaldyrdy.
Árine, ónerdiń óner bolyp tanylýy tańdaiynan marjan tógilgen talantty oryndaýshyǵa da bailanysty deýge bolady. Aitalyq, keshke arnaiy kelgen halyqaralyq baiqaýlardyń laýreaty Denis Fedorenko, Valeriia Kirillova, Anatolii Rykýnov jáne Natalia Skriabinalar óz ónerlerimen-aq sol biikke kóterilgen jandar. Ónerde shekara joq ekenin zaldaǵy kórermen yqylasy-aq dáleldep turdy.
Osy rette halyqtyń yqylasyna dán riza bolǵan ónerpazdar da óz lebizderin bildirisip jatty.
– Taldyqorǵan qalasyna úshinshi ret kelýim. Buǵan deiin Qaraǵandy, Pavlodar shaharlarynda óner kórsettik. Bul operada Nigiardyń obrazy meniń jandúnieme óte jaqyn. Óitkeni, munda lirika bar, rýhy myqty batyr qyzdyń obrazy bar. Jalpy lirikalyq, dramatikalyq sopranaǵa jazylǵan. Menińshe, mahabbat – máńgi taqyryp. Sondyqtan osy róldi jaqsy oryndap shyǵýǵa tyrysamyn. Áriptesterimniń barlyǵyna sáttilik tileimin, – dedi opera ánshisi Denis Fedorenko.
Opera degen janrdyń begzattyǵyn sezgen júrek az ba?! Onyń ystyq notalaryn qarmaǵan kóńil de sondai kóp ekenin ras. Sonyń aiqyn kórinisi, Taldyqorǵan aspanyn ánge bólegen osy bir airyqsha lepti kesh bolsa kerek. Ony syilaǵan óner maitalmandary da jetisýlyq kórermenderge súisinip, jer jannatyn kórýge áli talai keletinin jetkizdi.
Qozybai QURMAN,
Almaty oblysy
