Álemdegi memleketter qazaqstandyq munaiǵa áli de zárý bolyp qala beredi. Astanada ótken Sheteldik investorlar keńesiniń otyrysynda «Royal Dutch Shell plc» kontserniniń atqarýshy direktory Ben van Berden osyndai pikir bildirdi, dep habarlaidy QazAqparat tilshisi.
«Bizge bir jaidy eskerý kerek. «Sky» stsenarii aiasynda ózgerister jedel bolyp jatqanymen, 2050 jylǵa deiin álem áli de bolsa qazirgi munai men gazdyń 85 paiyzdyq óndirisine zárý bolady. Uzaq ýaqyt boiy álem burynǵysha qazaqstandyq munai men gazdyń qajettiligin sezinedi. Álem Qashaǵan, Qarashyǵanaq ken oryndary jáne ózge de jobalar aiasynda bizdiń birlesken jumysqa qajettilikti sezineri anyq», - deidi ol.
Ben van Berdennyń aitýynsha, «Shell» kontserni múmkindikterdi, atap aitqanda, biootyndy bolsyn, elektrdi nemese sýtekti bolsyn paidalana otyryp, álemdik birlestiktermen birge alǵa jylji bermek.
«Qazirgi tańda Qazaqstan jańa energetikalyq bolashaqqa qarai baǵyt alý turǵysynda sharalardy júzege asyryp jatqanyn bilemiz. Energiianyń balamaly kózderin qoldaný boiynsha iri aýqymdaǵy jobalar aiasynda 1 gigavattyq aýktsion kóptegen elderdiń qyzyǵýshylyǵyn týdyryp otyr. Óziniń diversifikatsiiasy men tabysty túrde damýynyń arqasynda «Shell» Qazaqstanǵa ekonomikany tiimdi túrde damytýyna kómektese alady. Bizdiń birlese otyryp, qiyndyqtardy eńserýge shamamyz jetedi», - deidi ol.
Ben van Berden óz sózinde Qazaqstan sekildi turaqty damý jolyna túsken memleketterdiń kóp emes ekenin tilge tiek etti.
«Mine, biz búgin jedel túrde jańǵyrý máselelerin osynda talqylap jatyrmyz. Qazaqstannyń damý keleshegi úlken úmit kúttiredi. Qarqynnyń osylai qala beretinine esh kúmánim joq», - dedi ol.
