Vaktsinalaý sharasyna 12 myńnan astam maman atsalysyp jatyr, dep habarlaidy QazAqparat.
Bul týraly Premer-Ministrdiń ornbasary Eraly Toǵjanov Meditsina qyzmetkerleri kúnine arnalǵan kezdesýde aitty.
«Búgin búkil álem vaktsinatsiia ǵana úirenshikti ómirge karantinsiz oralýǵa múmkindik beretinin túsindi. Elimizde halyqty vaktsinalaý boiynsha aýqymdy naýqan jalǵasyp jatyr. Koronavirýsqa qarsy immýndaý naýqanyna 12 myńnan astam meditsina qyzmetkeri atsalysyp júr. Biologiialyq qaýipsizdik problemalary ǵylymi-zertteý institýtynyń ǵalymdarynyń koronavirýsqa qarsy vaktsinanyń bes túrin ázirleýdegi eńbegin erekshe atap ótkim keledi», - dedi Eraly Toǵjanov.
Ol Qazaqstannyń óz vaktsinasyn jasaýy - kóptegen elder úshin kútpegen jańalyq bolǵanyn atady.
«Is júzinde Qazaqstan búginde álemde óz vaktsinasy bar alty eldiń qatarynda. Meniń oiymsha, bul – elimizdiń úlken jetistigi. Bul týraly aqparatqa kóptegen elderdiń tań qalǵanyn naqty bilemin. Talailar Qazaqstan óz vaktsinasyn ázirlei alady dep kútpese kerek», - degen Eraly Toǵjanov vaktsina ázirleýdiń basy-qasynda júrgen Kúnsulý Zákariia, Lespek Qutymbetov, Berik Hairýllin, Muhit Orynbaev, Marhaba Qasenov siiaqty mamandarǵa alǵysyn jetkizdi.
