Pýerto-Rikoda "Álem arýy-2021" sulýlyq baiqaýynyń 70-mereitoiy aiaqtaldy, - dep habarlaidy Tengrinews.kz tilshisi.
Baiqaý jeńimpazy, táj iegeri polshalyq Karolina Beliavskaia boldy. Bul týraly baiqaýdyń Twitter-degi resmi paraqshasynda habarlandy.
Birinshi vitse-miss amerikalyq Shri Saini, ekinshi vitse-miss Kot-d'Ivýardan kelgen Oliviia Ias atandy.
Karolina álemniń 97 elinen kelgen qatysýshylardan ozdy. "Álem arýy" baiqaýyn uiymdastyrýshylardyń aitýynsha, 22 jastaǵy Karolina qazirgi ýaqytta menedjment salasynda magistr dárejesin alyp, doktorantýrada oqýyn jalǵastyryp jatyr. Ol model bop ta jumys isteidi.
Arý qaiyrymdylyqpen de ainalysady. Onyń "Sulýlyq maqsatymen" atty jobasy Polshadaǵy úisiz jandarǵa únemi kómek kórsetedi. Joba Polshadaǵy Lodz qalasyndaǵy 300-ge jýyq muqtaj adamǵa ystyq tamaq, azyq-túlik, kiim, maskalar, zańgerlik keńester men kásibi meditsinalyq qoldaý kórsetýge baǵyttalǵan.
"Álem arýy" baiqaýynda Qazaqstan atynan aqtóbelik 23 jastaǵy Nazerke Karmanova óner kórsetti.
Eske salaiyq, 2021 jylǵy "Álem arýy" sulýlyq baiqaýynyń finaly qatysýshylar arasynda COVID-19 taralǵany belgili bolǵannan keiin keiinge qaldyrylǵan bolatyn.
