Osy aida elimizge koronavirýsqa qarsy vaktsinanyń 2 mln dozasy jetkiziledi. Bul týraly búgin Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy QazAqparat.
«Osy jyldyń 1 aqpanynan KVI-ge qarsy vaktsinatsiia naýqany jalǵasyp jatyr. 1 sáýirden vaktsinatsiialaýǵa jatatyn tulǵalar sanaty keńeitildi. Kesteni jergilikti atqarýshy organdar ázirleidi. Búginde birinshi komponent 197 706, ekinshi komponent 72 110 azamatqa salyndy. Respýblika boiynsha 1 myń turǵynǵa shaqqandaǵy kórsetkish 10,3-ti quraidy», - dedi Aleksei Tsoi.
Onyń atap ótýinshe, Memleket basshysynyń tapsyrmasyn oryndaý úshin sáýirde vaktsinanyń 2 mln dozasy jetkiziletindigi kútiledi. Bul vaktsinatsiialaýǵa jatatyn turǵyndardyń 23,4 paiyzyn qamtýǵa múmkindik beredi.
«Immýndaý josparyna sáikes, óńirlerge vaktsina jetkizý kólemi men aldyn ala merzimi aiqyndalǵan. Qazirgi epidemiologiialyq ahýaldy eskere otyryp, sáýirde vaktsina jetizý kólemi Nur-Sultan (284 myń), Almaty (464 myń), Shymkent (172 myń) qalalaryna, Almaty (232 myń) jáne Qaraǵandy oblystaryna (217 myń) ulǵaityldy», - dedi Aleksei Tsoi.
