QR Densaýlyq saqtaý ministri Aleksei Tsoi óz erkimen otstavkaǵa ketý týraly suraqtarǵa jaýap berdi, dep habarlaidy "Ult aqparat".
«Densaýlyq saqtaý ministrligi sońǵy kezderi jii synǵa ushyrap júr. Sizdiń de ministr retinde jaýapkershilik arqalaitynyńyz anyq. Mundai jaǵdailar qaitalana berse, óz erkińizben otstavkaǵa ketýge daiynsyz ba?», - degen suraq qoiyldy ministrge Ortalyq kommýnikatsiialar qyzmetinde.
Óz kezeginde Aleksei Tsoi Densaýlyq saqtaý ministrligi aldynda kóptegen máseleler turǵanyn aitty.
«Ókinishke qarai, pandemiia jappai barlyǵyna yqpal etip jatyr. Ministrliktiń de bar kúshi koronavirýs infektsiiasymen kúreske baǵyttalǵan. Búkil qyzmetkerlerimiz is júzinde táýlik boiy jumys isteýde. Eger elimizdiń basshylyǵy basqa mamandardy tartýdy durys dep uiǵarsa, biz árdaiym daiynbyz. Qazir biz tikelei jumysymyzǵa kirisip kettik, basqasyna ýaqyt joq. Biz azamattarymyzdy qutqarýmen ainalysyp jatyrmyz», - dep jaýap berdi Aleksei Tsoi.
