Densaýlyq saqtaý ministri Aleksei Tsoi epidemiologiialyq ahýaly jetkilikti deńgeide qadaǵalanbai jatqan úsh óńirdi atady. Onyń aitýynsha respýblikada koronavirýs juqtyrǵan azamattardyń 40 paiyzy – osy úsh oblystyń turǵyndary, dep habarlaidy "Ult aqparat".
«26 qańtardaǵy epidemiologiialyq ahýaldy baǵalaý matritsasyna sáikes, Qazaqstannyń 6 oblysy men 2 qalasy «qyzyl» aimaqta tur. Olar: Aqmola, Pavlodar, Atyraý, Qostanai, Soltústik Qazaqstan, Batys Qazaqstan oblystary men Nur-Sultan jáne Almaty qalalary. Bul rette Aqmola, Pavlodar, Qostanai oblystarynda epidemiologiialyq ahýaldy jetkilikti deńgeide baqylaý júrgizilip jatpaǵanyn atap ótý kerek. Osynyń saldarynan respýblikada koronavirýs juqtyrǵan azamattardyń 40 paiyzy – osy oblystardyń turǵyndary. Osyǵan bailanysty atalǵan óńirlerdiń ákimderi tiisti ári tiimdi shekteý sharalaryn engizip, onyń saqtalýyna basa mán berýi kerek», - dedi Aleksei Tsoi Úkimettiń keńeitilgen otyrysynda.
