Aýstriiadaǵy Álem chempionaty kezinde dopingke bailanysty ustalǵan qazaqstandyq shańǵyshy Aleksei Poltoranin qamaýdan bosatylǵan soń, Miýnhen arqyly Máskeý qalasyna ushyp ketken, dep habarlaidy QazAqparat tilshisi.
«Aleksei Poltoranin 28 aqpan kúni keshke Miýnhen arqyly Máskeý qalasyna ushyp ketken. Bizdiń diplomattarmen bailanysýdan bas tartty. Qazirgi ýaqytty onyń qaida ekenin bilmeimiz. Dopingke bailanysty suraqtarǵa biz jaýap bermeimiz, ony QR Mádeniet jáne sport ministrligine joldaý kerek. Qazaqstan azamattarynyń quqyǵy buzylmaý úshin bizdiń Konsýl sol kúni oqiǵa ornyna bardy, barynsha qolǵabys kórsetti. 28 aqpan kúni de konsýl sportshymen kezdesýdi kútti. Biraq, Poltoranin kezdesýden bas tartyp, Miýnhenge ketti. Bapkerleri de barlyq jaitty qupiia ustap otyr», - dedi QR Syrtqy ister ministrliginiń resmi ókili Aibek Smadiiarov Astanada ótken brifingte.
Budan buryn habarlanǵandai, Aýstriianyń Zeefelde qalasynda shańǵy jarysynan uiymdastyrylǵan Álem chempionatynda Qazaqstan, Aýstriia jáne Estoniia sportshylary antidopingtik erejelerdi buzdy degen kúdikke ilingen edi. Politsiia jalpy, tórt eldiń 9 sportshysyn ustaǵan. Keiin QR Shańǵy federatsiiasy bul oqiǵaǵa bailanysty túsinikteme berdi.
Estoniialyq sportshylar Karel Tammiarv men Andreas Veerpalý, sondai-aq Qazaqstan ókili Aleksei Poltoranin Halyqaralyq shańǵy sporty túrleri federatsiiasynan shettetildi.
Sondai-aq bul oqiǵaǵa qatysty QR SIM orynbasary Erjan Ashyqbaev túsinik bergen bolatyn. Ol Qazaqstan «ádil sport» qaǵidatyn ustanatynyn atap ótti. «Dopingpen kúres, sportshylarmen ashyq dialog sekildi ustanymǵa árqashan da mán berip kelemiz. Biz taza sportqa, sondai-aq bizdiń barlyq sportshylar úshin birdei jaǵdai jasaýǵa ekpin qoiýdamyz. Qazaqstan IýNESKO-nyń tiisti konventsiiasyna qosyldy jáne barlyq osy standarttar pysyqtalýda», - dedi E. Ashyqbaev.
