Qazaqstannyń Egipettegi elshisi Qairat Lama Sharif Aleksandriia kitaphanasynyń qoljazbalardy qalpyna keltirý mamandaryna Qazaqstandaǵy óte qundy sirek kitaptar men qoljazbalardy qazaq ǵalymdarymen birlesip zertteýge shaqyrdy, dep habarlaidy "Ult aqparat".
Qazaqstan Respýblikasynyń Egipet Arab Respýblikasyndaǵy Tótenshe jáne Ókiletti Elshisi Qairat Lama Sharif Aleksandriia kitaphanasyna bardy.
«Kitaphana direktory doktor Mustafa ál-Fiqhi ózi basqaryp otyrǵan zamanaýi úlgide jabdyqtalǵan rýhani qazyna ordasynyń jetistikterimen tanystyrdy. Óz kezegimde Qazaqstan Respýblikasynyń Táýelsizdiginiń 30 jyldyǵyna arnalǵan mádeni-tanymdyq sharalardy álemge áigili Aleksandriia kitaphanasynda birigip ótkizýdi usyndym. Mysyr tarapy usynys-pikirlerime qoldaý bildirdi», dep jazdy elshi Facebook -tegi paraqshasynda.
Ol Qazaqstan Respýblikasynyń Tuńǵysh Prezidenti – Elbasy kitaphanasy týraly áńgimelep bergen.
Sondai-aq, Qairat Lama Sharif Aleksandriia kitaphanasy týraly birqatar málimetti jariialady.
«Barshamyzǵa málim, Aleksandriia qalasynyń ataýy Eskendir Zulqarnaiyn (Aleksandr Makedonskii) esimimen bailanysty. Antika dáýirinde Jerorta teńizi jaǵalaýynda ornalasqan osy kóne shaharda sol zamanǵy júz myńdaǵan qoljazbalardy qamtyǵan Aleksandriia kitaphanasy dúniejúzine máshhúr bolǵan. Ókinishke orai, bizdiń eramyzǵa deiingi Iýlii Tsezar zamanynda Aleksandriia kitaphanasy órtenip ketedi.
1974 jyly Aleksandriia ýniversitetiniń bir top ǵalymdary Aleksandriia kitaphanasyn zamanaýi úlgimen qaitadan salý týraly bastama kóteredi. Egipettiń burynǵy Prezidenti Husni Múbarak bul usynystardy qoldaidy», - dep jazdy elshi.
IýNESKO óz kezeginde Aleksandriia kitaphanasynyń jobasy týraly 18 eldiń bilikti mamandarynan quralǵan halyqaralyq komissiiany jasaqtaidy.
Asýanda ótken halyqaralyq konferentsiiada Egipet (120 mln), Saýd Arabiiasy, Birikken Arab Ámirlikteri jáne Irak (65 mln), 26 shet elder (27 mln AQSh dollary) kóleminde qarjylyq kómek kórsetedi.
1992-2001 jyldary Aleksandriia kitaphanasynyń qurylysy júrgizilip, 2002 jyldyń 16 qazanynda saltanatty túrde ashylady.
Qazir kitaphananyń qorynda 8 millionǵa kitap bar. 2010 jyly Frantsiianyń ulttyq kitaphanasy 500 myńǵa jýyq kitapty syiǵa tartty.
Kitaphananyń 11 deńgeiden turatyn basty oqý zaly 70 myń sharshy metr. Ǵimarattyń ishinde konferents ortalyq, tanymal jazýshy Taha Hýsein atyndaǵy zaǵip jáne kórý qabileti tómen azamattar úshin arnaiy kitaphana, balalar kitaphanasy, úsh mýzei, tórt kórme zaldary, qoljazbalardy qalpyna keltirý zerthanasy jumys isteidi.
«Aleksandriia kitaphanasynyń qoljazbalardy qalpyna keltirý zerthanasymamandarynyń nazarlaryn Qazaqstan Respýblikasynyń Bilim jáne ǵylym ministrligine qarasty «Ǵylym ordasy» RMK Ortalyq ǵylymi kitaphanasynda óte qundy sirek kitaptar men qoljazbalar bar ekenine aýdardym. Qazaqstannyń orta ǵasyrdaǵy tarihy týraly syr shertetin Sirek kitaptar qoryndaǵy 91 myń dana, qoljazbalar qoryndaǵy 22 myń dana, shyǵys ádebietteri qoryndaǵy 9,9 myń danany qazaq ǵalymdarymen birlesip zertteýge shaqyrdym.
Sonymen qatar bul birlesken qazaq-mysyr jobasy Almaty qalasyndaǵy Qazaqstan Respýblikasynyń Ulttyq kitaphanasynyń kitap qorynda 30 myńǵa jýyq sirek kitaptar men qoljazbalar Máńgilik Uly dala Elimiz tarihynyń keibir beimálim betterin toltyrýǵa septigin tigizetine mán berdim. Qazaqstan Respýblikasynyń Prezidenti Qasym-Jomart Toqaev «Táýelsizdik bárinen de qymbat» atty maqalasynda jáne Elbasymyz Nursultan Nazarbaev «Bolashaqqa baǵdar: rýhani jańǵyrý» atty maqalasynda osy tarihi máselelerge erekshe toqtalǵanyn atap óttim», - dedi Qairat Lama Sharif.
Onyń aitýynsha, Aleksandriia kitaphanasynyń mamandary bul usynystardy qoldap, birigip atsalysýǵa daiyndyqtaryn bildirdi.
