Qazaqstanǵa resmi saparmen kelgen Serbiia Prezidenti Aleksandr Výchich Aqordada Elbasy Nursultan Nazarbaevqa «Serbiia Respýblikasy» ordenin tabys etti, dep habarlaidy QazAqparat tilshisi.
Resmi kezdesý barysynda mártebeli meiman Nursultan Nazarbaevqa jyly qabyldaǵany úshin shynaiy rizashylyǵyn bildirip, Serbiia men Qazaqstan arasyndaǵy ekijaqty qarym-qatynasty damytýdaǵy zor úlesin atap ótti.
«Shaqyrǵanyńyz úshin úlken alǵysymdy bildiremin. Ekijaqty qarym-qatynasymyzdy damytý úshin óte jaqsy perspektiva bar», - dep atap ótti Serbiia Prezidenti.
Sonymen qatar Aleksandr Výchich Nursultan Nazarbaevqa kóptegen máselelerde jan-jaqty qoldaý kórsetip kele jatqany úshin alǵysyn jetkizdi. Eki eldiń arasyndaǵy ekonomikanyń túrli salalaryndaǵy yntymaqtastyqtyń keńeie túsetindigine úmitti ekendigin aitty.
«Siz Serbiia Respýblikasynyń aýmaqtyq tutastyǵyn, egemendigin qoldap kelesiz», - dedi mártebeli meiman.
Sóz sońynda Aleksandr Výchich Qazaqstan Prezidenti Nursultan Nazarbaevqa «Serbiia Respýblikasy» ordenin tabys etti. Bul orden Serbiianyń sheteldik dostaryna beretin eń joǵary nagradasy sanalady.
«Bul nagradany Vladimir Vladimirovich (Pýtin) men Si Tszinpin ǵana alǵan», - dedi Serbiia Prezidenti.
Ait keteiik, Serbiia basshysy Qazaqstan Prezidenti Nursultan Nazarbaevtyń shaqyrýymen resmi saparmen kelip otyr. Búgin mártebeli meiman Aqordada Nursultan Nazarbaevpen kezdesý ótkizdi.
Kezdesý barysynda Nursultan Nazarbaev Serbiia Prezidentin «Dostyq» ordenimen marapattady. Sapar aiasynda Aleksandr Výchich Qazaqstan-Serbiia iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysady dep josparlanǵan.
Serbiia prezidentiniń sapary barysynda birqatar mańyzdy qujattarǵa qol qoiylmaq. Onyń ishinde Qazaqstan men Serbiia úkimetteri arasyndaǵy qylmysqa qarsy kúrestegi yntymaqtastyq týraly kelisim, sondai-aq, Qazaqstannyń Qoǵamdyq damý ministrligi men Serbiianyń jastar saiasaty jáne soprt ministrligi arasyndaǵy ózara túsinistik týraly memorandým bar.
Jalpy aǵymdaǵy jyldyń 6 aiynda Qazaqstan men Serbiia arasyndaǵy saýda-sattyqtyń kólemi 16,7 mln AQSh dollaryn qurady. Qazirgi kezde Qazaqstanda 20-dan astam serbiialyq kompaniia tirkelgen. Olardyń basym bóligi kóterme jáne bólshek saýdamen, sondai-aq, turǵyn-úi men kommertsiialyq nysandardyń qurylysymen ainalysady.
