Aldyn ala berilip otyrǵan aqparatqa sáikes, QR Prezidenti Qasym-Jomart Toqaevtyń «Qazaqstan Respýblikasy azamattarynyń qaryz júktemesin azaitý týraly» Jarlyǵyna sáikes, 443 myń qazaqstandyqtyń nesiesi keshiriledi, dep habarlaidy QazAqparat tilshisi.
«Jańa Jarlyqqa sai, nesie boryshy óteletin halyqtyń sanatyn aittyq. Eńbek jáne halyqty áleýmettik qorǵaý ministrliginiń bazasy boiynsha Qazaqstanda joǵaryda atalǵan sanat boiynsha (kópbalaly otbasylar, múgedek balalary bar otbasylar, jalǵyz asyraýshysynan airylǵan otbasylar, ataýly áleýmettik kómek alatyndar, jetim balalar) 933 myń azamat bar. Olardyń tolyq málimetteri tirkelgen. Sondyqtan, ekinshi deńgeili banktermen kezdesý kezinde kimniń nesie alǵanyn nemese almaǵanyn anyqtaimyz. Álbette, 933 myń azamattyń bári de nesie alǵan joq. Aldyn ala aqparat boiynsha, mundai azamattardyń sany 443 myń bolyp otyr», - dedi Premer-Ministrdiń orynbasary Gúlshara Ábdiqalyqova búgin Úkimettiń baspasóz ortalyǵynda.
Aita ketsek, keshe QR Prezidenti Qasym-Jomart Toqaev «Qazaqstan Respýblikasy azamattarynyń qaryz júktemesin azaitý týraly» Jarlyqqa qol qoiǵan bolatyn.
Elimizdegi áleýmettik turmysy tómen toptaǵy azamattar - kópbalaly otbasylar, múgedek balalary bar otbasylar, jalǵyz asyraýshysynan airylǵan otbasylar, ataýly áleýmettik kómek alatyndar jáne jetim balalar túrli sebeptermen qiyn jaǵdaiǵa tap bolyp, óz attaryna alǵan nesielik mindettemelerin oryndai almai otyr.
Tikelei jáne ataýly qarjylai kómek retinde joǵaryda atalǵan sanattaǵy azamattar úshin memleket ekinshi deńgeili bankter men shaǵyn qarjy uiymdarynan alynǵan jalpy mólsheri 300 myń teńgege deiin negizgi nesieni jáne oǵan eseptelgen syiaqyny óteidi.
