2020 jyly temirjol salasyndaǵy qyzmetkerlerdi attestatsiialaý josparlanyp otyr. Bul týraly «Jolaýshylar tasymaly» AQ bas direktorynyń korporativtiń máseleler jónindegi orynbasary Asylhan Qaldykozov málim etti, dep habarlaidy QazAqparat.
«Bizde 6 myńǵa jýyq jolserik, 1 myńǵa tarta bilet kassiri qyzmet etýde. Jyldyń basynan beri 385 adam tártiptik jazaǵa tartyldy. Sonyń ishinde 170 adammen eńbek kelisimsharty buzyldy. Bul turǵyda biletsiz jolaýshy jáne rásimdelmegen júk tasymaldaǵany úshin qyzmetkerlerge qatysty shara qoldanyldy», - dedi ol Ortalyq kommýnikatsiialar qyzmetindegi baspasóz máslihatynda.
Onyń sózine qaraǵanda, 2020 jyly temirjol qyzmetkerlerin attestatsiialaý men olardyń biliktiligin jetildirý boiynsha qosymsha jumystar josparlanyp otyr.
«Birinshi kezekte biz ózimizdiń qyzmetkerlermen jumys isteýimiz kerek jáne qyzmetine salǵyrt qaraityndardy bul salaǵa jolatpaý kerek. Iaǵni, temir salasyna teris kózqaras týdyratyn adamdar jolaýshylarǵa qyzmet kórsetpeý tiis», - dedi Asylhan Qaldykozov.
Eske sala keteiik, QR Prezidenti Qasym-Jomart Toqaev Úkimetke jazda poiyz biletiniń tapshylyǵyn joiýdy tapsyrdy.
«Úkimetke jaz mezgilinde poiyz biletteriniń tapshylyǵyn qoldan jasaýdy toqtatý týraly tapsyrma berdim. Bul jaǵdai azamattarymyzǵa qolaisyzdyq týǵyzyp, elimizdegi ishki týrizmniń damýyna kedergi keltirip otyr», dep jazdy Memleket basshysy Twitter-degi paraqshasynda.
