QR Densaýlyq saqtaý ministri Eljan Birtanov memlekettik-jekeshelik áriptestik baǵytynda salynatyn nysandar týraly aitty, dep habarlaidy "Ult aqparat".
«Jalpy, 2026 jylǵa deiin densaýlyq saqtaý salasynda 1,5 trln teńge investitsiia tartý josparlanyp otyr. Onyń 60 paiyzy memlekettik-jekeshelik áriptestik aiasynda. 19 myń jumys ornyn qamtamasyz ete otyryp, 838,5 mlrd teńge somasynda 16 iri aýrýhana salýdy josparlap otyrmyz», - dedi ministr Úkimet otyrysynda.
Onyń sózine qaraǵanda, búginde investitsiialardyń jalpy kólemi 439 mlrd teńgege teń 7 memlekettik-jekeshelik áriptestik jobasy iske asyrylýda.
«Bul turǵyda Petropavl, Túrkistan, Nur-Sultan qalalaryndaǵy úlken aýrýhanalardy qamtyp otyr. Sonymen qatar, Almaty men Qaraǵandyda ýniversitettik klinikalar qurylysy boiynsha tiisti sharalar atqarylýda. Áleýetti investorlarmen jeke qarjylyq bastamalardyń daiyndyq jumystary iske asyrylýda», - dedi Birtanov.
Onyń atap ótýinshe, budan bólek ministrlik quny 400 mlrd teńgege jýyq investitsiialardyń qosymsha 9 jobasyn pysyqtaýǵa kiristi.
