Búgin Eýraziia damý banki EADB-ǵa qatysýshy memleketter ekonomikasynyń 2021 jylǵy ósimine arnalǵan baiandamasyn tanystyrady, dep habarlaidy Sputnik agenttigi.
Teńge baǵamy
Baiandamaǵa sáikes, EADB-ǵa qatysýshy memleketter valiýtalarynyń dollarǵa qatysty baǵamy 2021 jyly turaqtalady. Biyl teńgeniń dollarǵa shaqqandaǵy ortasha baǵamy bir dollar úshin 421,6 teńge kóleminde bolady. Sondai-aq 2022 jyldyń qorytyndysy boiynsha bul kórsetkish - 424,8 teńge, 2023 jyldyń qorytyndysy boiynsha 430 teńge sheginde bolady degen boljam bar.
Aita ketý kerek, Qazaqstan Ulttyq bankiniń málimetine sáikes, 31 naýryzda dollardyń resmi baǵamy bir dollar úshin 424,34 teńgeni qurap otyr.
JIÓ qalai ózgeredi?
EADB analitikteri usynǵan aqparatqa sáikes, bul EADB-ǵa qatysýshy memleketterdiń ekonomikasy qarqyndy túrde qalypqa keletin jyl bolady. Áleýmettik oqshaýlaý sharalaryn jeńildetý jáne syrtqy jaǵdailardy jaqsartý tutynýshylyq jáne investitsiialyq suranystyń kúsheiýi kezinde sheshýshi faktorǵa ainalady.
"Osy jyldyń qorytyndysy boiynsha Qazaqsan ekonomikasy 4%-ke ósip, 2021 jyldyń aiaǵy men 2022 jyldyń basyna qarai daǵdarysqa deiingi deńgeige qol jetkizedi", - dep jazylǵan baiandamada.
Boljamǵa sáikes, 2022 jyldyń qorytyndysy boiynsha Qazaqstan JIÓ ósimi 4,5%-ti qurap, 2023 jyldyń qorytyndysy boiynsha 5,1%-ke artady.
Sarapshylar túrli syn-táýekelder týyndaǵan jaǵdaida da 2021 jyly EADB-ǵa qatysýshy elderdiń ekonomikasy damýyn toqtatpaidy, tek qarqyny birshama báseńdeidi dep boljady.
Qazaqstan premer-ministri Asqar Mamin úkimet 2021 jyly atqaratyn jumystardyń basty maqsaty Qazaqstan ekonomikasynyń ósimin 3%-ke jetkizýdi kózdeitinin málimdedi. Osy jyldyń qańtarynda JIÓ ósiminiń qarqyny minýs 4,5%-ti qurap, qańtar-aqpan ailarynda minýs 2,9%-ke jetti.
2020 jyldyń qorytyndysy boiynsha Qazaqstannyń JIÓ 2,6%-ke tómendegen. Salystyrý úshin aitsaq, 2019 jyly Qazaqstan JIÓ 4,5%-ke ósti.
EADB – bul uiymǵa múshe memleketterdiń ekonomikalyq ósýine, olardyń arasyndaǵy saýda-ekonomikalyq bailanystardyń keńeiýine jáne Eýraziialyq keńistiktegi integratsiialyq protsesterdiń damýyna yqpal etýge arnalǵan halyqaralyq qarjy uiymy. Qazaqstan, Resei, Armeniia, Tájikstan, Belarýs jáne Qyrǵyzstan – EADB-ǵa múshe memleketter.
