Qazgidromet sinoptikteri 17-19 naýryzǵa arnalǵan aýa raiy boljamyn jariialady, - dep habarlaidy "Ult aqparat".
Meteorologtardyń málimetinshe, aldaǵy úsh táýlikte Qazaqstannyń soltústik jartysyna soltústik-batys antitsiklony áser etedi. Sondyqtan aiaz, jaýyn-shashynsyz aýa raiy bolady. Túnde termometr baǵandary 20-28 gradýs aiazǵa deiin jetedi.
"Eldiń ońtústik jartysyna ońtústik tsiklon men soǵan bailanysty atmosferalyq front áser etedi. Jaýyn-shashyn, keide qatty jaýyn-shashyn (jańbyr, qar) bolady, jel kúsheiedi. Kóktaiǵaq bolyp, aýa temperatýrasy kúndiz 0-10 gradýs jyly aýa temperatýrasyna deiin, túnde 0-10 aiazǵa deiin tómendeidi. Respýblikada tuman túsedi", - delingen habarlamada.
