Májilis jáne barlyq deńgeidegi máslihattarǵa sailaý ótkizý elimiz úshin kelesi jyldyń mańyzdy oqiǵasy bolmaq. Bul týraly Táýelsizdik kúni qarsańynda ótken Memlekettik nagradalar tapsyrý rásiminde QR Prezidenti Qasym-Jomart Toqaev aitty, dep habarlaidy "Ult aqparat".
«Biz eldi saiasi jańǵyrtý protsesin tabandy túrde jalǵastyrýǵa niettimiz. Qazirgi ýaqytta reformalardyń jańa toptamasy ázirlenip jatyr, ol jaiynda kelesi jyldyń basynda jariia etemiz», - dedi QR Prezidenti.
Memleket basshysy bul «halyq únine qulaq asatyn memleket» qurýǵa, ádilet jáne teń múmkindikter qaǵidattaryn bekitýge baǵyttalǵan Qazaqstandaǵy demokratiialyq túrlenýge tyń serpin beretindigin basa aitty.
«Májilis jáne barlyq deńgeidegi máslihattarǵa sailaý ótkizý elimiz úshin kelesi jyldyń mańyzdy oqiǵasy bolmaq. Aldaǵy sailaý joǵary azamattyq belsendilik tanytyp, qoǵamnyń saiasi saýatty ekenin kórsetetinine senimdimin. Sailaý naýqany qazaq memlekettiginiń institýtsionaldyq turaqtylyǵyn taǵy bir ret naqty dáleldeidi», - dedi Qasym-Jomart Toqaev.
