Foto: ©️ Tengrinews.kz / Álihan Sariev
Sinoptikter 23-25 qarashada aýa raiy qandai bolatyny týraly boljam jasady, - dep habarlaidy "Ult aqparat".
Meteorologtar málimetinshe, Qazaqstannyń basym bóligi áli kúnge deiin tsiklonnyń yqpalynda bolady, jańbyr men qar túrinde jaýyn-shashyn kútiledi. Atap aitqanda, 23 qarashada ońtústikte jáne ońtústik-shyǵysta, 23-24 qarashada soltústik-batysta, 24 qarashada soltústikte qatty jaýyn-shashyn (jańbyr, qar) bolady dep boljanyp otyr.
"Kezeńniń aiaǵynda ǵana ońtústikte, ońtústik-shyǵysta jáne ortalyqta aýa-raiy birtindep turaqtalady, iaǵni jaýyn-shashynsyz aýa-raiy kútiledi.
Respýblika boiynsha jel (15-28 m/s) kúsheiedi, 23 qarashada soltústikte, soltústik-batysta, 23-24 qarashada ońtústik jáne ońtústik-shyǵysta óte qatty jel (30 m/s jáne odan da asa) boljanady. Sondai-aq eldiń soltústik jartysynda burqasyn, kóktaiǵaq bolady dep kútilip otyr.
Kezeńniń sońyna qarai aýa temperatýrasy batysta túnde 15 gradýs aiaz-2 jylydan 8 gradýs aiaz-8 gradýs jylyǵa deiin joǵarylaidy. Al soltústik-batysta, soltústikte, ortalyqta túnde 3-15 gradýs aiazǵa deiin, respýblikanyń ońtústiginde, ońtústik-shyǵysynda túnde 6 gradýs aiaz-5 gradýs jylyǵa deiin tómendeidi, shyǵysta 10 gradýs aiaz-3 gradýs jyly aýa raiy kútiledi" - delingen habarlamada.
