Jalpy ishki ónimniń ortasha jyldyq ósý qarqyny 5 jylda 4,4 paiyzdy quraidy. Bul týraly Parlament Májilisiniń jalpy otyrysynda aityldy, dep habarlaidy QazAqparat.
Jalpy otyrysta Ulttyq ekonomika ministri Rýslan Dálenov eldiń 2020-2024 jyldarǵa arnalǵan áleýmettik-ekonomikalyq damý boljamyn baiandady.
«Álemdik qarjy uiymdarynyń málimetterine sáikes, 2019 jyly munai baǵasynyń konsensýs-boljamy 65 dollardy quraidy. Al 2020 jyly bir barrel úshin 63 dollaryna deiin tómendeidi. Boljam men biýdjettik parametrlerdi qalyptastyrý úshin bazalyq stsenarii negizge alyndy. Ol munai baǵasyn 55 dollar kóleminde kózdeidi. Jalpy ishki ónimniń naqty ósýi 2020 jyly 4,1 paiyz deńgeiinde boljanyp otyr. 2024 jyly ol 4,7 paiyzǵa jetedi. Ortasha jyldyq ósý qarqyny 5 jylda 4,4 paiyzdy quraidy», - dedi ministr.
Jalpy ishki ónimniń ósýi jalpy jinaqtyń, ishki tutynýdyń jáne eksporttyń ósýi esebinen qamtamasyz etiledi.
R. Dálenovtiń aitýynsha, investitsiialar ekonomikalyq ósýdi qoldaýdyń mańyzdy faktory bolady. Salalyq bóliniste negizgi ósim shikizattyq emes sektoryna tiesili bolady. Bul óńdeý ónerkásibi, qyzmet kórsetý salasy jáne qurylys. Bul salalardyń ortasha ósimi 4,7 paiyz deńgeiinde bolady. Jalpy ishki ónimniń ósýindegi salymy 3,5 protsenttik tarmaqty quraidy.
«Munai óndirý kólemi 2020 jyly 90 million tonnadan, 2024 jyly 100 million tonnaǵa deiin ósedi. Óndirýdiń ósýi Teńiz, Qarashyǵanaq, Qashaǵan ken oryndaryn keńeitý, sondai-aq teńizdegi olardy paidalanýǵa berý esebinen bolady», - dedi vedomstvo basshysy.
