Qazaqstandyq aýyr atlet Albert Linderdiń inisi Semen Linder sportshynyń qaitys bolǵanǵa deiin qandai máselemen betpe-bet kelgenin aitty, dep habarlaidy Sputnik Qazaqstan.
Semen Linder áleýmettik jelidegi paraqshasynda óziniń jáne aǵasynyń medalderin jerge kómgen sáti túsirilgen video jariialady.
"Aǵa, sen máńgi meniń júregimdesiń! Bul - bizdiń medaldarymyz!", - dep jazdy Semen.
Ol aǵasynyń ózin moiymai, myqty ári adal bolýǵa úiretkenin aitty.
"Aǵamnyń alǵa qoiǵan maqsaty boldy, ol aýyr atletikamen ómir súrdi. Bul isti bárinen artyq jaqsy kórdi. Sportqa jan-tánimen berildi, shtangany qatty jaqsy kórdi, sol arqyly ózin tapty! Onyń maqsaty men armany boldy! Ol elimizdiń patrioty edi. Qazaqstan týyn maqtanyshpen kóterdi! Júregi keń adam edi...", - dep jazdy Semen Linder.
Onyń sózinshe, Albert jattyǵý kezinde kúizeliske túsip, qolyn syndyrǵan. Al jattyqtyrýshysy jigitti mamandarǵa jibermegen.
"Aǵam sporttan ketkennen keiin aýyr jaǵdaiǵa tap boldy,kóńili qaldy. Bári ony umytyp ketti. Jattyqtyrýshysy birneshe ret kelip, dál sol kúiinde jattyǵýdy jalǵastyrýǵa kóndirip kórdi. (...) Sodan keiin meniń aǵamnyń jattyǵý jasamaitynyn túsinip, ol da umytyp ketti", - dep jazdy Semen Linder.
Aitýynsha, sportshy abyroiy asqaqtap turǵanda bárine kerek, al keiin almastyratyn adam tez tabylady.
"Aǵam aýyr atletikadan basqa salada ózin taba almady! Eshkimge eshteńe aitpastan ketip qaldy! Meniń aǵam ketti!", - dedi marqumnyń týysy.
Ol sondai-aq mundai jattyqtyrýshy balalardy jattyqtyrmaýy qajet ekenin aitty.
"Bul áreketinen keiin qalaisha jattyqtyrýshy retinde qyzmetin jalǵastyryp jatqanyn elestete almaimyn", - dep tolyqtyrdy Linder.
Ol kináli adamnyń zań boiynsha jazalanatynyna úmit bildirdi.
Qazaqstandyq aýyr atlet, Qazaqstannyń birneshe dúrkin chempiony jáne Aziia chempiony Albert Linderdiń qazasy týraly 17 qyrkúiekte belgili boldy. Ol nebári 25 jasta edi. Ózin-ózine qol salǵany habarlandy.
Buǵan deiin aýyr atletikadan álemniń tórt dúrkin chempiony Ilia Ilin Linderdiń ólimi týraly aityp, sportshylar fizikalyq jaraqat alyp qana qoimai, psihologiialyq turǵyda da zardap shegetinin jetkizdi. Ol Qazaqstanda mundai atletter úshin qalpyna keltirý ortalyǵy joq ekenin, tek birneshe adam ǵana sporttan tys ómirde óz ornyn tabatynyn jetkizdi.
