Alaiaqtyqqa jáne qarjy piramidalaryna qarsy keshendi is-sharalar ázirlenedi. Bul týraly Úkimet otyrysynda QR Ulttyq ekonomika ministri Áset Erǵaliev málim etti, dep habarlaidy QazAqparat.
Ministrdiń aitýynsha, Prezident Joldaýyn iske asyrý jalpyulttyq josparynyń tórtinshi baǵytynda 6 is-sharany iske asyrý kózdelgen. Naqty aitanda, «Kásibi biliktilikter týraly» Zań jáne jumyspen qamtýdyń jańa úlgilerin retteý tetikteri ázirlenetin bolady. Kóshi-qon saiasatynyń jańa tujyrymdamasy ázirlenedi. Elmizdiń ońtústiginen soltústigine kóship jatqan azamattarǵa járdemaqy bólýdiń qoldanystaǵy tásilderin qaita qaraý kózdeledi.
«Altynshy baǵytta 13 is-sharany iske asyrý kózdelgen. Aýyldyq jerlerdegi azamattyq bastamalardy qoldaýdyń tiimdi tásilderi ázirlenedi. Depýtat mandatyn bólý kezinde kvotany mindetti túrde eskerý boiynsha talap zań júzinde bekitiletin bolady. Sonymen qatar, kvota bólinetin azamattar sanatynyń tizimin keńeitý josparlanýda. Sybailas jemqorlyqpen tiimdi kúresti jalǵastyrý maqsatynda orta merzimdi kezeńge arnalǵan tiisti strategiialyq qujat bekitiledi. Otbasylyq jáne genderlik saiasat tujyrymdamasyna ózgerister engiziledi. Alaiaqtyqqa jáne qarjy piramidalaryna qarsy keshendi is-sharalar ázirleý josparlanýda», - dedi Áset Erǵaliev.
Onyń atap ótýinshe, jetinshi baǵytta 5 is-shara iske asyrylady.
«Jańa mádeniettiń daryndy ókilderin dáripteýge baǵyttalǵan naqty is-sharalardy ázirleý josparlanýda. Kreativti indýstriiany qoldaý qoryn qurý múmkindigi qarastyrylatyn bolady. «Ulttyq Rýhani Jańǵyrý» ulttyq jobasy aiasynda otanshyldyq, bilimge qushtarlyq jáne eńbekqorlyq siiaqty qasietterdi dáripteý boiynsha sharalar ázirleý kózdelip otyr», - dedi ol.
