Elimizdiń Ishki ister ministrligi sońǵy ýaqytta jeke tulǵalardyń derbes derekterin alaiaqtyq jolmen ielený áreketiniń jiilegenine alańdaýly, dep habarlaidy QazAqparat.
«Qazaqstanda jasalatyn qylmystyń 10 paiyzdan astamy - alaiaqtyq. Tehnologiianyń damýyna bailanysty azamattardy aldaýdyń ádisteri kún sanap ósýde. Sońǵy ýaqytta internet resýrstarda jariialanǵan habarlandyrýlardy paidalana otyryp, azamattardyń derbes derekterin ielený jaǵdailary jiilep ketti», - dedi QR Ishki ister ministrliginiń resmi ókili Nurdildá Oraz onlain ótken baspasóz máslihatynda.
Sondai-aq, ministrliktiń resmi ókili alaiaqtar óz áreketin qalai júzege asyratynyn aitty.
«Alaiaqtar azamattar jariialaǵan habarlandyrýlarǵa qońyraý shalyp nemese habarlama joldap, taýardy satyp alǵysy keletinin jáne satýshynyń bank kartasyna kepilzat alýdy usynady. Bank aýdarymyn rastaý úshin alaiaqtar satýshyǵa «fishing» siltemesin jiberip, ony toltyrýdy suraidy. Silteme is júzinde azamattardyń kartochka shoty týraly aqparat jinaýǵa arnalǵan. Osy derekterdi alǵannan keiin alaiaqtar jábirlenýshilerdiń bank shotynan aqsha urlaidy», - deidi ol.
IIM taratqan aqparatqa sáikes, 11 aida internet alaiaqtyqqa qatysty 12 myńǵa jýyq is tirkelgen.
«Onyń 5 myńǵa jýyǵy alaiaqtardyń internet-saýda alańdary men saitta jariialanǵan habarlandyrýy boiynsha joq taýarlar nemese qyzmetter úshin tolyq nemese ishinara tólem jasaý faktileri boiynsha qozǵaldy. 2,7 myńǵa jýyq alaiaqtyq onlain kredit rásimdei otyryp, azamattardyń derbes derekterin ielenýge bailanysty boldy. 1,5 myńnan astam alaiaqtyq azamattardyń jeke derekteri men kartochkalyq shotynyń derektemelerin iemdenip, mobildi banking arqyly aqsha urlaý arqyly jasalǵan», - deidi IIM resmi ókili.
