Alash ziialylary 1921 jyly tyrysqaq (holera) dertimen kúresetin komitet qurdy. Ár ýezd ortalyqtarynda emdeitin kabinet ashyp, epidemiiaǵa jol bermedi, dep habarlaidy QazAqparat.
Bul týraly «Aq jol» demokratiialyq partiiasy «Alash» institýtymen birge uiymdastyrǵan «Qazaq Respýblikasynyń 100 jyldyǵy jáne onyń qurylýyna «Alash» qairatkerleriniń úlesi» taqyrybynda ótken onlain konferentsiiada aityldy.
«Qazaq avtonomiiasy – Alash ziialylary eńbeginiń jemisi. Memlekettik tildi áli kúnge deiin sheshe almai jatyrmyz. Bul másele ol kezde de ýshyǵyp turdy. Ol kezde qazaqtardyń úles salmaǵy 50% boldy. Memlekettik tildi qalai bir jolǵa qoiamyz, is qaǵazdardy qalai qazaq tiline aýdaramyz degen máseleni Orynborda otyrǵan azamattar jaqsy sheshti. Ózge tildi ult ókilderin ózine qarsy qoimas úshin aldymen eki tildi qatar jiberdi. 1925 jyly jappai orystar turatyn jerde de is-qaǵazdy 100% memlekettik tilde júrgizý týraly sheshim qabyldady. Bilikke F.Goloshekinniń bilikke kelýimen bul másele sheshimin tappai, toqtap qaldy», - deidi tarih ǵylymdarynyń doktory, professor Ziiabek Qabyldinov.
Ol kezde bilim, densaýlyq salasynda da jaǵdai qiyn bolǵan.
«Bul máseleni sheshý úshin kóptegen jerde mektep ashyp, muǵalimderdi daiyndaityn Qazaq institýtyn ashty. Tipti mektep oqýlyqtaryna kóp qarjy bóldi. Densaýlyq salasyna qatysty máseleni de jaqsy sheshti. Qazaq aýyldaryna azyq-túlikti ýaqytyly jetkizip turýǵa tyrysty. Dárigerler pýnkterin ashyp, monsha kóbirek sala bastady. 1921 jyly tyrysqaq dertimen kúresetin komitet qurdy. Ár ýezd ortalyqtarynda emdeitin kabinet ashyp, epidemiiaǵa jol bermedi», - deidi ol.
