Kelesi jyly Alash ulttyq avtonomiiasynyń, Alash partiiasynyń jáne Alash Orda úkimetiniń qurylǵanyna 100 jyl tolady. Bul - Ulttyq demokratiialyq qozǵalys tarihyndaǵy eleýli kezeń. Osyǵan orai biylǵy jyldyń qazan aiynda «Aq jol» QDP parlamenttik fraktsiiasynyń depýtattary Premer-Ministr B.Saǵyntaevtyń atyna depýtattyq saýal joldap, «qazaq halqynyń bostandyǵy úshin aianbai eńbek etken Alash qairatkerlerin laiyqty ulyqtaýǵa arnalǵan tanymdyq is-sharalar belgilep, iske asyrýdy» usynǵan edi.
Úkimet basshysy osynaý mańyzdy máselege bailanysty depýtattarǵa jaýap berdi.
Onda Alash arystaryn este qaldyrý maqsatynda birqatar sharalardyń júzege asyrylyp jatqanyn aita kelip, «2017 jyly ortalyq jáne jergilikti atqarýshy organdar jalpyhalyqtyq tarihi máni bar atalǵan oqiǵanyń 100 jyldyǵy aiasynda respýblikalyq deńgeide birqatar mereitoilyq is-sharalar ótkizýdi josparlap otyr. Mádeniet jáne sport ministrligine múddeli memlekettik organdarmen birlesip, 2017 jyly Alash partiiasynyń qurylýynyń 100 tolýy aiasynda is-sharalar keshenin ótkizý boiynsha sharalar qabyldaý tapsyryldy» delingen.
«Aq jol» QDP Parlamenttik fraktsiiasy sailaýaldy baǵdarlamasyn júzege asyrý jáne qatardaǵy qazaqstandyqtardyń múddelerin qorǵaý boiynsha jumysyn jalǵastyrýda.
"Ult aqparat"
