Alakól men Býrabaiǵa demalýǵa baratyn otbasynyń kem degende bir múshesinde PTR-test anyqtamasy bolýy kerek. Bul talap týraly MSM Týrizm indýstriiasy komitetiniń tóraǵasy Dastan Ryspekov aitty, dep habarlaidy QazAqparat.
«Eldegi epidemiologiialyq jaǵdaidyń nasharlaýyna bailanysty koronavirýs infektsiiasynyń taralýyn shekteý jáne azamattardyń qaýipsizdigin qamtamasyz etý maqsatynda aýmaqtarda karantindik sharalar qaitadan engizilgenin bilesizder. Osyny eskere otyryp, keibir óńirlerdegi demalys oryndarynda jáne kýrorttyq aimaqtarda, atap aitqanda Shyǵys Qazaqstandaǵy Alakól jaǵalaýynda jáne Shýche, Býrabai kýrorttyq aimaǵynda demalýshylardy qabyldaýdy toqtatý týraly sanitarlyq dárigerdiń qaýlylary qabyldanǵan bolatyn. Kýrorttyq aimaqtardaǵy ornalastyrý oryndarynyń úzdiksiz jumys isteýin qamtamasyz etý jáne tólengen brondar boiynsha aqshalai qarajatynyń qaitarylýyn boldyrmaý maqsatynda Mádeniet jáne sport ministrligi óńirlerdiń ákimdikterimen birlesip, qabyldanǵan sanitarlyq dárigerlerdiń qaýlylaryna keibir tolyqtyrýlar engizý múmkindigi talqylandy», - dedi Dastan Ryspekov OKQ-da ótken baspasóz máslihatynda.
Onyń aitýynsha, osy jumystyń nátijesinde Almaty oblysyndaǵy Alakól kóliniń jaǵalaýynda, sondai-aq Shýche, Býrabai kýrorttyq aimaǵynda ornalasqan kýrorttyq aimaqtar boiynsha ortaq sheshim jasalǵan.
«Atap aitqanda, Taýarlar men qyzmetterdiń sapasy men qaýipsizdigin qyzmetimen berilgen tiisti daiyndyq aktileri bar ornalastyrý oryndarynda aldyn ala tólengen brondar boiynsha demalýshylardy qabyldaýǵa ruqsat etildi. ShQO-daǵy Alakól kóliniń jaǵalaýynda otbasynyń bir múshesinde PTR-anyqtamasy bolsa buryn kózdelgen talaptardy eskere otyryp, demalýyna bolady. Blok-posttardaǵy ótkizý júiesi týristerde ornalastyrý oryndary usynǵan bronnyń bar-joǵy týraly derektermen salystyrylady», - dedi ol.
