Aýǵanstan azamattyq aviatsiiasynyń ókili "Ál-Jazira" telearnasyna Kabýl áýejaiy jumysy qaita bastalatynyn aitty.
"3 qyrkúiekte ishki reister bastalady, halyqaralyq reister keiinirek shyǵady" dedi ol.
Aýǵanstanda elýge jýyq áýejai bar. Eń áýeli Qandaǵar, Mazari-Sharif jáne Jalalabad qalalarynyń áýejailary iske kirisedi degen boljam bar.
Áýejai jumysyn tezirek qalpyna keltirý úshin Katar 1 qyrkúiekte tehnikalyq qyzmetkerlerin ushaqpen jibergen. Doha Amerika áskeri ketkennen keiin Kabýl áýejaiynyń jabylǵany strategiialyq jáne gýmanitarlyq problemalar týǵyzýy múmkin dep sanaidy.
Osy ustanymdaǵy Túrkiia da "Talibanǵa" tehnikalyq kómek bergisi keledi. Onyń ústine eki el de qaýipsizdikti qamtamasyz etý máselesiniń bir shetin moiyndaryna alǵaly otyr. Qazir áýe kompaniialarynyń bári Aýǵanstannyń áýe keńistigin ainalyp ótip jatyr.
Áýejaidyń ashylǵanyn Germaniia, Niderland, Ulybritaniia sekildi Eýropa elderi de qalaidy. Ulybritaniianyń syrtqy ister ministri Dominik Raab óz eli sáýir aiynan beri 17 myńǵa jýyq azamaty men aýǵandardy evakýatsiialaǵanyn jáne Aýǵanstanda qaýip astynda qalǵandarǵa pana berýge daiyn ekenin málimdedi.
Kabýl áýejaiynyń ashylǵanyn aýǵandarǵa gýmanitarlyq kómek bergisi keletin BUU da kútip otyr. Pentagon evakýatsiia aiaqtalarda áskeri maqsatta qoldanýǵa bolatyn tehnikalardyń bárin jaramsyz qylyp tastaǵanyn, biraq órt sóndirýshi máshineler men júk tiegish tehnikalarǵa tiispegenin málimdegen. Olardy áýejai jumysyna paidalanýǵa bolady.
Áýe reisterinen ózge aqsha aýdarymdary da jandanady: Western Union kompaniiasy Aýǵanstandaǵy qyzmetin qaita qosatynyn, 3-17 qyrkúiek aralyǵynda komissiia alýdan bas tartatynyn habarlady.
Dúniejúzilik bank shetelderde jumys isteitin aýǵan azamattary ótken jyly óz eline úlken kólemde aqsha aýdarǵanyn, bul aqshanyń aýǵan ekonomikasynda mańyzdy ról atqaratynyn aitqan.
15 tamyzda tálipter Kabýldy alyp, Aýǵanstanǵa baqylaý ornatqanyn jariialaǵan. AQSh pen onyń odaqtastary óz eliniń azamattary men tálipter qýǵyn-súrgininen seskengen aýǵan azamattaryn evakýatsiialaǵan. Evakýatsiialanǵandardyń jalpy sany 120 myńǵa jetken.
30 tamyzda AQSh áskeri Aýǵanstannnan tolyǵymen shyǵyp ketti. Amerika áskeri Aýǵanstanda 20 jylǵa jýyq turdy. 2001 jyly 11 qyrkúiektegi teraktini "Ál-Qaida" terror uiymy moinyna alǵany, onyń jetekshisi Ýsama ben Ladenniń Aýǵanstanǵa jasyrynǵany belgili bolǵannan keiin AQSh Aýǵanstanǵa ásker kirgizgen. Aýǵanstanda AQSh-qa "ál-Qaidadan" ózge "Taliban" qozǵalysy da kóp jyl qarsylyq kórsetken.
