Ál-Farabi mereitoiy birqatar elderde ótip jatyr – Darhan Qydyráli

Halyqaralyq Túrki akademiiasy elordada «Jibek jolyndaǵy órkenietter úndestigi» atty halyqaralyq forým ótkizdi, dep habarlaidy QazAqparat.

Akademiia Prezidenti Darhan Qydyráliniń aitýynsha, bul alqaly jiyn Parijde IýNESKO-nyń shtab-páterinde ótýi tiis edi.

«Alaida, jahandy jailaǵan álemdik pandemiiadan jiyndy onlain rejimde ótkizýge májbúr boldyq. Soǵan qaramastan, kóptegen halyqaralyq uiymdardyń jetekshileri men 30-dan astam eldiń tanymal ǵalymdary qatysyp otyr. Farabtan shyqqan oishyldyń mereili datasyna orai, QR Prezidenti Qasym-Jomart Toqaevtyń Jarlyǵymen «Farabi jyly» dep jariialandy. Arnaiy memlekettik komissiia qurylyp, kóptegen jumystar atqaryldy. Memlekettik komissiia tóraǵasy, QR Memlekettik hatshysy Qyrymbek Kósherbaev arnaiy qatysyp otyr», - dedi Darhan Qydyráli Ulttyq akademiialyq kitaphanada ótken jiynnyń ashylýynda.

Onyń aitýynsha, Farabitaný zertteýleri, Farabiǵa qatysty jiyndar pandemiiaǵa bailanysty onlain rejimde túrli memleketterde, sonyń ishinde islam elderinde ótip jatyr.

«Búgingi jiynnyń bir mańyzy – Ońtústik Koreiadan bastap, Úndistan, Pákistan, Qiyr Shyǵys, Taiaý Shyǵys, Eýropa, Afrika syndy tórt qurlyqtyń ǵalymdary qatysyp otyr. Munyń ózi ál-Farabidiń adamzatqa ortaq jáne úlken órkeniettiń negizin qalaǵan tulǵa ekenin kórsetedi. Barshasy dinine, tiline qaramastan ál-Farabi usynǵan «Qaiyrymdy qala» jáne «Adam baqyty» degen úlken ideiaǵa tirelip tur. Qazirgi ýaqytta bul ózekti. Sondyqtan, kemel kisilik nemese qaiyrymdy qoǵam tóńireginde ǵalymdar óz usynystaryn aitady dep oilaimyn», - deidi D. Qydyráli.

Onlain rejimde jiynǵa Iran Islam Respýblikasynyń Ǵylym, zertteýler jáne tehnologiia ministri Mansýr Golami, ISESKO bas hatshysy Salim ál-Malik, IYU janyndaǵy ǵylym-tehnologiialar jónindegi turaqty komitet direktory Mýhammed Ikbal Chaýdari, Túrkiia Prezidentiniń bas keńesshisi Ialchyn Topchý jáne halyqaralyq uiymdardyń jetekshileri, diplomattar, belgili farabitanýshy ǵalymdar qatysty.

Sonymen birge, spiker Halyqaralyq Túrki akademiiasynyń ál-Farabi mereitoiyna qatysty qandai sharalar atqarǵanyn baiandady.

«Túrki akademiiasyna múshe elderde ál-Farabige qatysty biraz shara ótti. Ál-Farabidiń arab tilindegi klassikalyq eńbegin orys jáne qazaq tilderine aýdaryp shyqtyq. Taiaý kúnderi onyń tusaýkeseri bólek ótedi. Sonymen birge, birqatar elderde ótetin jiyndarǵa qatysamyz. Mysaly, Islamabadta jáne Túrkiiada úlken jiyn ótkeli jatyr. Solardyń barlyǵyna akademiia óz tarapynan qatysa beredi. Sebebi, ál-Farabi adamzattyq musylmandyq álem degenmen, birinshi kezekte ál-Farabidiń túrki áleminiń tuǵyrly tulǵasy ekeni belgili. Sondyqtan, Túrki akademiiasy biylǵy ál-Farabi jylynda sharalar atqara beredi», - dedi Darhan Qydyráli.

Buǵan deiin QR Memlekettik hatshysy, QR Memlekettik hatshysy, Ábý Nasyr ál-Farabidiń 1150 jyldyǵyn ótkizý jónindegi memlekettik komissiia tóraǵasy Qyrymbek Kósherbaev uly oishyldyń mereitoiy qalai toilanǵanyn aityp bergen edi.