«Balapan» telearnasy QR Táýelsizdiginiń 30 jyldyǵyna jáne álemniń ekinshi ustazy Ábý Nasyr Ál-Farabidiń 1150 jyldyǵyna orai 10 bólimdi «Ál-Farabi» animatsiialyq telehikaiasyn jaryqqa shyǵardy, dep habarlaidy "Ult aqparat".
2D formatta jasalǵan tanymdyq jobanyń ár bólimi 8 minýttan turady.
Telehikaianyń basty maqsaty – túrki elinen shyqqan Ábý Nasyr Ál-Farabidiń taǵylymdy ómir jolyn baiandaý arqyly elimizdiń búldirshinderi men jastaryn ǵylym-bilimge baýlý.
«Usynyp otyrǵan jobamyzdyń tarih pen bolashaq arasyndaǵy altyn kópir bolaryna nyq senimdimiz. Sebebi, Ábý Nasyr Ál-Farabi – álemdik ǵylym men bilim tarihyndaǵy uly tulǵa. Osynaý teńdessiz ǵalymnyń ómiri men ǵylymi izdenisteri jaiynda tushymdy dúnie jasaýdy basty mindetimiz dep bilemiz. Jobada Ál-Farabidiń ǵylymi jetistikterge oqý, izdenis, eńbek pen danalyqtyń arqasynda jetkeni baiandalady. Mundai kórkemdik, kontseptýaldy sheshim ekran aldyndaǵy búldirshinderdiń izdeniske, eńbek pen oqýǵa bet burýyna sebepker bola alady degen oidamyz», – deidi arna direktory Maqpal Jumabai.
Animatsiialyq telehikaia álemdik órkeniet pen mádeniettiń oshaǵy bolǵan ejelgi Tikal, Afina, Baǵdat, Kair, Shańan, Farab qalalaryn tanystyrýdan bastalady.
«Ál-Farabi» animatsiialyq jobasy «Balapan» telearnasynan dúisenbi-juma kúnderi, saǵat 20:10, 23:00-de kórsetiledi.
Telearna biyl oqý-tanymdyq, shytyrman oqiǵaly, oiyn-saýyqtyq janrda 27 animatsiialyq joba usynady. Onyń ishinde el Táýelsizdiginiń 30 jyldyǵyna arnalǵan «Meniń elim», «Babalar izi», «Baýyrjan», «Alpamys», «Qazaqstan – qyzǵaldaqtar mekeni», «Táýelsizdiktiń altyn kilti» jáne «Ǵaryshker bala Jiger» syndy animatsiialyq týyndylar bar.
