El ishinde emge dárý ekeni jii aitylyp júrgen aqjelkektiń (hren) adam densaýlyǵyna paidasy qandai? Bul suraqqa «Antikor Live» jobasynda bergen suhbatynda Qazaq taǵamtaný akademiiasynyń prezidenti, meditsina ǵylymdarynyń doktory Tóregeldi Sharmanov jaýap berdi, dep habarlaidy QazAqparat.
«Aqjelkek bolsyn, sarymsaq bolsyn – adam densaýlyǵyna paidasy zor eken degen áńgime jii aitylyp júr ǵoi. Alaida árbir aýrý boiynsha kez kelgen dári shóp nemese dári bolsyn 100 paiyz paida beredi degen áńgime joq. Statistika boiynsha eń asyp ketkende – 95-96 paiyz. Ar jaǵynda 4-5 paiyz qalyp qoiady báribir. Al sol 4-5 paiyzdyq emdi beretin dáriler men shipa – halyq emshiligi. Sol sekildi 100 adamnyń ishinde 4-5 adamnyń aǵzasyna ol jaqsy áser etýi múmkin. Paidasy tietin adamdar bar», - deidi Tóregeldi Sharmanov.
Onyń aitýynsha el ishinde aýyzdan-aýyzǵa taraǵan áńgimeden keiin kókónistiń keibir túrine suranys surapyl bolyp ketedi.
«Keide emdeýdiń 90 paiyzdyq tiimdiligi dalada qalady da, kórshiniń paidalanǵan emi sizge de em bolyp qonýy múmkin. Bul jerde adamnyń kóńil-kúiine de kóp nárse bailanysty. Palataǵa kirip keletin dárigerdiń bet-júzi, kózqarasyna qarap naýqastyń aýrýy jeńildep ketýi yqtimal. Ol – psihologiia. Sondyqtan adamnyń aldymen emdelip ketetini boiynsha senimi bolýy kerek. Dári báribir 100 paiyz jazylyp ketetinińizge jaýap bermeidi», - dedi ol.
