Qytaida ómir boiyna bas bostandyǵynan aiyrylǵan, Aqjarqyn Turlybaidyń isi boiynsha kúdikke ilingen Nigeriia azamaty ustaldy. Bul týraly qazaq qyzynyń advokaty Suńqar Nurmaǵambetov habarlady, dep jazady Sputnik Qazaqstan.
"Aldyn ala málimet boiynsha 2014 jyly Aqjarqyn Turlybaidyń Qytaiǵa saparyn uiymdastyrdy degen kúdikke ilingen Nigeriia azamaty Adindo Nonso Fortýne "Djonni" shet memlekettiń aýmaǵynda ustaldy", - dep habarlady advokat Suńqar Nurmaǵambetov.
Esterińizge sala keteiik, 2015 jyly Qazaqstannyń Ishki ister ministrligi bul adamǵa qatysty qylmystyq is qozǵaǵan bolatyn.
Nurmaǵambetov tolyǵyraq aqparat alý úshin Qazaqstan Ishki ister ministrligine advokattyq saýal joldaǵanyn aitty.
Aqjarqyn Turlybaidyń isi
Qazaqstan azamaty Aqjarqyn Turlybai 2014 jyly naýryzda Gýanchjoý áýejaiynda ustalǵan edi. Oǵan shekaradan 4,5 keli esirtkini alyp ótpek boldy degen aiyp taǵyldy. Ol kezde otandasymyz 20 jasta bolǵan. 2015 jyldyń maýsymynda Qytai soty ony ómir boiyna bas bostandyǵynan aiyrdy. Sotta Aqjarqyn sheteldik dosy aldap ketkenin aityp, kinásin moiyndaǵan joq.
2016 jyly sot sheshimi joiylyp, is qaita qaraýǵa jiberildi.
Araǵa úsh jyl salyp, 2019 jyldyń 27 jeltoqsanynda Gýanchjoý soty úkim shyǵardy – jaza ózgerissiz qaldy.
2019 jyly Turlybaidyń anasy Zýhra Seitimova Qazaqstan Prezidentine kómek surap hat jazdy.
2019 jyly qyrkúiekte Prezident Qasym-Jomart Toqaev Qytaiǵa sapary kezinde izgilik tanytyp, Aqjarqyndy Otanyna qaitarýǵa járdemdesýge shaqyrdy.
Osy jyldyń mamyrynda Bas prokýratýra Qytai Aqjarqyn Turlybaidy Qazaqstanǵa ekstraditsiialaýdan bas tartqanyn habarlady.
Buǵan deiin Qazaqstannyń Qytaidaǵy elshiligi Turlybai qasyndaǵy sottalǵandarǵa aǵylshyn tilin úiretip júrgenin habarlaǵan edi. Sonymen qatar, ol kórkem ádebiet oqidy, dene shynyqtyrýmen de ainalysady. Qytai tilin jaqsy meńgerip alǵan.
