Qytaida túrmede otyrǵan Aqjarqyn Turlybaidyń anasy Zýhra Seitimova Qazaqstan Prezidenti Qasym-Jomart Toqavtan kómek surady, dep habarlaidy Sputnik Qazaqstan.
"Memleket basshysy Qasym-Jomart Toqaevtan qyzym Aqjarqyn Turlybaiǵa kómektesýdi suraimyn. Ol "nigeriialyq qylmystyq toptyń qurbany boldy" degen málimet bar. Soǵan súiene otyryp, qyzymnyń jazyqsyz ekenin aitqym keledi. Sotta sýdia da qyzymnyń kinási joq ekenin aityp otyr. Ol azamattardan da qyzymdy bosatýdy suradym", - dedi Zýhra Seitimova.
3 qyrkúiekte Gýanchjoý qalalyq sotynda Aqjarqyn Turlybaidyń isi boiynsha otyrys ótken edi. Osy otyrysqa arnaiy barǵan Zýhra Seitimova qyzyn kórgen.
"Qyzymmen kóp sóilesken joqpyn. Aqjarqyn tek "jaǵdaiym jaqsy" dedi. Basqa eshteńe aitqan joq", - dedi Aqjarqynnyń anasy.
Qyzynyń jazyqsyz ekenine senimdi Zýhra Seitimova Qasym-Jomart Toqaevtan kómek suraýǵa májbúr bolyp otyr.
"2014 jyldyń naýryzynda Qazaqstan azamaty, qyzym Aqjarqyn Turlybai Qytaida esirtki kontranbandasymen shuǵyldandy degen kúdikpen qamaýǵa alyndy. Bes jyl boiy qyzymnyń ústinen tergeý júrip jatyr. Áýeli ómir baqi túrmede otyrý jazasy kesildi, keiin ol úkimniń kúshi joiyldy. Qylmystyq is qaita qaralatyn boldy", - degen Seitimova prezidentke jazǵan hatynda.
Ol Aqjarqyndy qazaqstandyq jáne qytailyq advokattar tegin qorǵap júrgenin ári Qazaqstannyń syrtqy ister ministrligi de kómektesip jatqanyn aityp, olarǵa alǵys bildirgen.
"Qyzymnyń shetel aýmaǵynda jazasyn óteýi, til bilýdegi qiyndyqtar, asa aýyr qylmys jasady dep aiyptalýy bizge aýyr zardabyn tigizdi. 2015 jyly Ortalyq Aziia óńirlik aqparattyq úilestirý ortalyǵy qyzym Aqjarqyndy nigeriialyq qylmystyq toptyń qurbany dep moiyndady, búginde qylmyskerler ustalǵan joq. Biraq QR ishki ister ministrligi tiisti sharalardy qolǵa almai otyr. Onyń ishinde qyzymdy sheteldik qylmystyq toptyń qurbany retinde moiyndaý da bar", - degen ol.
Seitimova Konstitýtsiianyń 11-baby 2-tarmaǵy boiynsha respýblika óziniń jáne el aýmaǵynan tysqary júrgen azamattaryn qorǵaýǵa jáne olarǵa qamqorlyq jasaýǵa kepildik beretinin eske salyp ótedi.
"Qurmetti prezident! Sizdiń diplomatiialyq jáne halyqaralyq qatynastar salasyndaǵy bai tájiribeńiz ben Qazaqstannyń syrtqy ister ministri qyzmetin atqarǵanyńyzdy eskeretin bolsaq, jaǵdaidyń qiyndyǵyn jaqsy túsinesiz. Osyǵan bailanysty sizden qyzym Aqjarqyn Turlybaidy Otanyna qaitarý úshin tiisti sharalardy qolǵa alýǵa járdemdesýińizdi suraimyn", - degen Seitimova.
Aqjarqyn Turlybai 2014 jyly naýryzda Gýanchjoý áýejaiynda ustalǵan bolatyn. Oǵan shekaradan 4,5 keli esirtki alyp ótpek boldy degen aiyp taǵyldy. Ol kezde otandasymyz 20 jasta edi. 2015 jyldyń maýsymynda Qytai soty ony ómir boiyna bas bostandyǵynan aiyrdy. Sotta Aqjarqyn sheteldik dosy aldap ketkenin aityp, kinásin moiyndaǵan joq. Keiin sot úkiminiń kúshi joiylyp, qylmystyq is qaita qaralatyn boldy.
Biyl 3 qyrkúiekte Qytaidyń Gýanchjoý qalalyq sotynda Aqjarqyn Turlybaidyń isi boiynsha otyrys ótti. Eki saǵattan astam ýaqytqa sozylǵan otyrysta qorǵaýshy tarap usynǵan qylmystyq is materialdary qaraldy. Úkimniń jariialanatyn kúni ázirshe belgisiz.
