Ishki ister ministrligi Qytaida jazasyn ótep jatqan Aqjarqyn Turlybaidyń isine qatysty Nigeriia azamatynyń Qazaqstanǵa ekstraditsiialanatynyn aitty, - dep habarlaidy vedomostvonyń baspasóz qyzmeti.
"20 maýsymda Nigeriiada Interpoldyń Qazaqstan Respýblikasy IIM-degi Ulttyq Ortalyq biýrosynyń suraýy boiynsha QR QK 259-baby 2-bóliginde kózdelgen qylmys (esirtki quraldaryn nemese psihotroptyq zattardy zańsyz daiyndaý, qaita óńdeý, satyp alý, saqtaý, tasymaldaý, jóneltý nemese ótkizý) jasaǵany úshin halyqaralyq izdeýde júrgen Adindo Nonso Fortýne ustaldy.
Qazirgi ýaqytta ony qamaýda ustaý jáne Qazaqstanǵa odan ári ekstraditsiialaý týraly protsestik sheshim qabyldaý maqsatynda qajetti materialdar Interpoldyń Nigeriia UOB-na joldandy", - dedi IIM-niń baspasóz qyzmetindegiler.
Aita keteiik, Aqjarqyn Turlybai 2014 jyly naýryzda Gýanchjoý áýejaiynda ustalǵan. Oǵan shekaradan 4,5 keli esirtki alyp ótpek boldy degen aiyp taǵyldy. Ol kezde otandasymyz 20 jasta bolǵan edi. 2015 jyldyń maýsymynda Qytai soty ony ómir boiyna bas bostandyǵynan aiyrdy.
Sotta Aqjarqyn sheteldik dosy aldap ketkenin aityp, kinásin moiyndaǵan joq. 2016 jyly sot sheshimi joiylyp, is qaita qaraýǵa jiberildi. Araǵa úsh jyl salyp, 2019 jyldyń 27 jeltoqsanynda Gýanchjoý soty úkim shyǵardy – jaza ózgerissiz qaldy. 2019 jyly Turlybaidyń anasy Zýhra Seitimova kómek surap Qazaqstan Prezidentine hat jazdy.
2019 jyly qyrkúiekte Prezident Qasym-Jomart Toqaev Qytaiǵa sapary kezinde izgilik tanytyp, Aqjarqyndy Otanyna qaitarýǵa járdemdesýge shaqyrdy. Biyl mamyrda Bas prokýratýra Qytai Aqjarqyn Turlybaidy Qazaqstanǵa ekstraditsiialaýdan bas tartqanyn habarlady.
