Ulttyq bank tóraǵasy Daniiar Aqyshev teńge baǵamyna qatysty túsinikteme berdi, dep habarlaidy Sputnik Qazaqstan tilshisi.
"Teńge baǵamy syrtqy jáne ishki naryqtarǵa táýeldi. Sońǵy birneshe kúnge deiiin barlyq makroekonomikalyq parametr turaqty boldy. Eń aldymen ol – munaidyń joǵary baǵasy jáne saýda seriktesteri valiýtasynyń turaqtylyǵy. Ókinishke qarai, AQSh-tyń Reseige qarsy sanktsiialary Reseidiń qor naryǵy men valiýta naryǵyn qubyltty. Resei bizdiń saýda seriktesimiz, EAEO-ǵa múshe eldermiz. Árine, biz bir-birimizge yqpal etemiz. Sondyqtan osy jaǵdaida Reseide bolyp jatqan oqiǵalar Qazaqstanǵa áserin tigizedi", — dedi Aqyshev.
Ulttyq bank tóraǵasy teńge rýblge bailanyp qalmaǵanyn atap ótti.
"Biz bir-birimizge táýeldi bolǵanymyzben, teńge rýblge bailanyp qalǵan joq. Nege rýbl qatty ózgerip, teńge az qubyldy? Birinshi sebep, Qazaqstan qandai jaǵdai bolmasyn sanktsiialarǵa tikelei de, janama da ilikpeidi. Sebebi bizdiń memleket barlyq elmen jaqsy qarym-qatynasta", — dedi ol.
Aqyshev ulttyq bank úkimetpen birlesip valiýta naryǵyndaǵy jaǵdaidy zerttep jatqanyn aitty.
"Ulttyq bank teńge baǵamyna qatysty boljam jasamaidy. Halyqqa asyǵys sheshim qabyldamaýǵa keńes beremin. Naryqta qazir suranys pen usynys balansy júrip jatyr. Munyń bári syrtqy shokpen, iaǵni Reseidegi jaǵdaimen bailanysty. Al Qazaqstanda ondai ózgeriske esh sebep joq. Teńge kúsheiýi de, álsireýi de múmkin. Aiyrbas pýnkterinde teńge de, sheteldik valiýta da jetkilikti. Halyq dúrligip jatqan joq", — dedi Aqyshev.
Ol interventsiiaǵa qatysty aqparat 7-8 mamyrda jariialanatynyn atap ótti.
