Belgili rejisser Dárejan Ómirbaevtyń «Aqyn» filminiń álemdik deńgeidegi tusaýkeseri 34-shi Halyqaralyq Tokio kinofestivali sheńberinde ótedi, dep habarlaidy "Ult aqparat" Sháken Aimanov atyndaǵy «Qazaqfilm» AQ baspasóz qyzmetine silteme jasap.
Atalǵan baiqaý biylǵy jyldyń qazannyń 30-y men qarashanyń 8-i aralyǵynda Japoniiada ótedi.
QR Mádeniet jáne sport ministrligi tapsyrysy boiynsha «Ulttyq kinony qoldaý memlekettik ortalyǵy» qoldaýymen Sh.Aimanov atyndaǵy «Qazaqfilm» AQ túsirgen «Aqyn» filmi Didar esimdi moiyndalmaǵan jazýshynyń ómiri týraly baiandaidy. Filmniń stsenariii nemis jazýshysy German Gesseniń «Avtorlyq kesh» jelisi boiynshy jazylǵan.
- «Aqyn» filmi eń aldymen otandyq kórermenderge arnalǵan. Osynyń aldynda túsirgen meniń basqa filmderime qaraǵanda, bul týyndyny mazmuny men problematikasy jaǵynan ulttyq kino deýge bolady. Filmde qazaq tili men ádebietine qatysty problemalar kóterilgen. Alaida bul kópshilikke ortaq másele, óitkeni búginde qanshama tilder joiylyp barady, - dedi rejisser Dárejan Ómirbaev.
Aita ketsek, 1980 jyldan beri ótkizilip kele jatqan Tokyo International Film Festival kinofestivali Halyqaralyq kinoprodiýserler qaýymdastyǵy federatsiiasynyń (FIAPF) tirkeýinen ótken, «A» sanatyndaǵy álemdegi úzdik 15 kinobaiqaýdyń qataryna kiretin bedeldi festivalderdiń biri.
Biyl festivalge qatysýǵa 113 elden 1533 ótinim kelip túsken eken. Nátijesinde festivaldiń basty baiqaýyna 15 kinotýyndy iriktelip alynǵan, onyń 10 filmi alǵash ret kórermenderge usynylatyn bolady. Halyqaralyq qazylar alqasyn aty ańyzǵa ainalǵan frantsýz aktrisasy Izabel Iýpper basqarady.
Festivaldiń ashylý saltanatynda amerikalyq rejisser Klint Istvýdtyń «Jigitterdiń kóz jasy» atty kartinasy kórsetiletin bolady.
