Senat depýtaty Aqylbek Kúrishbaev joǵary oqý oryndarynda bilikti mamandardy daiarlaý máselesine qatysty Úkimet basshysynyń orynbasary Eraly Toǵjanovtyń atyna saýal joldady, dep habarlaidy "Ult aqparat".
«Álemdik jetekshi ýniversitetterdiń sáttilik formýlasy - professor-oqytýshylarynyń zamanaýi biliktiliginde. Sol sebepti olardyń áleýetin damytý oqý ornynyń basty nazarynda bolyp, qajetti yntalandyrýlar jasalady jáne bilim berý ári ǵylymi qyzmettiń barlyq saiasatyn tikelei oqytýshy-ǵalymnyń ózi anyqtap, menedjerlerdi sailaýǵa, biýdjetti bólýge qatysady. Naqtyraq aitsaq, olarda ýniversitetti basqarý júiesi alqalyq jáne demokratiialyq qaǵidattarǵa sai qalyptasqan. Olardyń ǵylymi keńesi rektordyń kandidatýrasyn usynyp qana qoimai, JOO-ǵa qandai basshy qajet ekenin ózderi sheshedi, iaǵni oǵan qoiylatyn biliktilik talaptaryn anyqtaidy. Atalǵan jetekshi ýniversitetterdegi basqarý júiesiniń túbegeili aiyrmashylyqtaryn kórsetetin kóptegen mysaldardy keltirýge bolady», - dep toqtaldy senator.
Onyń aitýynsha, Qazaqstandaǵy memlekettik joǵary oqý ornynyń qatardaǵy oqytýshysynyń ortasha jalaqysy shamamen 120 myń teńgeni quraidy, bul mekteptegi keibir muǵalimderdiń jalaqysyna qaraǵanda az. Sonymen qatar, kóptegen pedagoktardyń jyldyq oqý júktemesi 700 saǵat sheginde (sabaqqa daiyndalý ýaqytyn eseptemegende). Sonymen qatar, ol ǵylymmen jáne kýrator retinde tárbie jumysymen ainalysýǵa ýaqyt tabýy tiis.
«Eger týrasyn aitatyn bolsaq, bizdiń JOO-daǵy oqytýshylyq jumys búgingi kúni konveierlik óndiriske ainalyp keledi, al oqytýshynyń ózi ár túrli esepter, reitingter men ǵylymi maqalalardy jariialaý boiynsha mindettemeler men basqa da buiryq, nusqaýlardy únsiz oryndaýshyǵa ainalýda. Ýniversitetterdiń Ǵylymi keńesi naqty basqarý tetikterine ie emes jáne kóptegen ýniversitetterde rektorattyń sheshimderin qamtamasyz etý jónindegi deklarativti organǵa ainaldy. Al ýniversitette jumys isteitin professorlyq-oqytýshylyq quramnyń ókilderi Direktorlar keńesine táýelsiz direktor retinde kirýge quqyǵy joq, óitkeni bul Aktsionerlik qoǵam týraly zańǵa qaishy keledi», - dedi A. Kúrishbaev.
«Ýniversitetterge akademiialyq erkindik bere otyryp, biz olardyń basshylyǵyna syrttan JOO isine aralasýdy shekteitin keń ókilettikter berdik. Biraq professor-oqytýshylar ujymynyń jáne Ǵylymi keńesterdiń basqarý júiesine qatysýyn, sondai-aq damyǵan elderdegidei Direktorlar keńesi quramyndaǵy ókildigin qamtamasyz etpedik. Qazirgi ýaqytta Prezidentimizdiń jańashyl bastamalarynyń arqasynda elimizde qoǵamymyzdy demokratiialandyrý, qoǵamdyq baqylaýdy damytý, jergilikti ózin-ózi basqarý, ákimderdiń sailanýy jáne basqa da qadamdar boiynsha progressivti ózgerister bolyp jatyr. Elimizdiń bolashaǵyn qalyptastyratyn joǵary oqý oryndary birinshi kezekte demokratiialyq qaǵidattardy saqtaýymen basqaǵa úlgi bolýy tiis», - dedi depýtat.
Onyń paiymynsha, joǵaryda aitylǵandarǵa bailanysty barlyq joǵary oqý oryndary úshin memlekettik bilim berý granttarynyń qunyn ulttyq ýniversitetter deńgeiine deiin kóterýdi jáne qatardaǵy ýniversitetter oqytýshylarynyń jalaqysyn olardyń deńgeiimen teńestirý týraly máseleni ádiletti qarap, sheshý kerek.
